Ամենամեծ հարցն այն է, թե Ալթունյանի նախաձեռնողականությունը ում անձնական, գույքային շահերին կարող էր վնասել. պաշտպան

Քննիչը միջնորդել էր 2 ամսով երկարաձգել Պաշտպանության նախարարության հասարակայնության հետ կապերի եւ լրատվության վարչության նախկին պետ Գեւորգ Ալթունյանի խափանման միջոցը, որը անհասկանալի հիմնավորումներով բավարարել էր առաջին ատյանի դատարանը: Այս մասին NEWS.am-ին հայտնեց Ալթունյանի պաշտպան Սիրանույշ Սահակյանը:

Նա նշեց, որ այդ որոշումը բողոքարկվել է հակակոռուպցիոն դատարան եւ դատավոր Ամիրյանի նախագահությամբ մասնակի բավարարվել է, այժմ Գեւորգ Ալթունյանը գտնվում է տնային կալանքի տակ՝ համակցված գրավի հետ:

«Հունվարին խափանման միջոցի հարցը ենթակա է վերանայման», հավելեց Սահակյանը:

Պաշտպանը ասաց, որ արարքին Ալթունյանի առնչությունը հիմնավորող հիմնավոր կասկածի շեմը նույնիսկ հաղթահարված չէ. «Նախ նշեմ, որ այդպես էլ մութ է մնում, թե ծրագիրրը գոյություն ունի: Մենք կարծում ենք, որ այո, այն գոյություն ունի եւ դա ապացուցելի է եւ եթե վերագրվում էր տեխնիկական թերություններ, դա կարելի էր հիմնավորել բացառապես փորձաքննությամբ, մինչդեռ նաեւ փորձաքննություն չկա, որը նաեւ ցույց կտար, որ ստեղծված, գործարկված ծրագիրը չի համապատասխանել տեխնիկական բնութագրերին: Ավելին՝ պարոն Ալթունյանին վերագրվում է նախնական համաձայնությամբ որոշակի գործողություններ կատարել, այն պարագայում, երբ այդ անձանց հետ իր ֆիզիկական շփումը կամ գոյություն ունեցող բոլոր միջոցներով շփումը հիմնավորող փաստ չկա: Սա էլ անհեթեթություն է, որ նախնական համաձայնությամբ գործողությամբ կատարումը վերագրում են այնպիսի անձի մասնակցությամբ, որին պարոն Ալթունյանը երբեւիցե չի տեսել եւ առնչություն չի ունեցել կապի միջոցներով եւ այդ կապակցությամբ նաեւ քննությունը չի կարողացել փաստեր հայթայթել: Գործում կան բազմաթիվ այլ խնդիրներ, պարզապես նկատի ունենալով, որ գտնվում ենք մինչդատավարական վարույթում եւ առհասարակ տվյալ գործը առնչվում է նաեւ գաղտնիք պարունակող տեղեկությունների հետ, մենք այս փուլում սահմանափակված ենք շատ մանրամասներ ներկայացնելու առումով, սակայն համապատասխան փուլերում հանրությունը կտեղեկանա շատ մանրամասների հետ: Կարճ նշեմ, որ պարոն Ալթունյանի գաղափարը՝ էլէկտրոնայնացնելու եւ այնպիսի կարեւոր պրոցեսներ բանակում, ինչպիսին են՝ զորակոչը, մատակարարումները, եւ այլ խնդիրների հետ, որոնք գտնվում են կոռուպցիոն բարձր ռիսկերի գոտում, ուստի ամենամեծ հարցն այն է, թե նման նախաձեռնողականությունը ում անձնական գույքային շահերին կարող էր վնասել եւ ովքեր կարող էին պատվիրատու լինել նման ապօրինի քրեական հետապնդման»,- ասաց նա:

Ավելի վաղ Քննչական կոմիտեն հաղորդել էր, որ պաշտոնեական դիրքն օգտագործելով խմբի կողմից խարդախությամբ առանձնապես խոշոր չափերով՝ ընդհանուր 106.3 մլն ՀՀ դրամ հափշտակելու եւ պաշտոնեական կեղծիք կատարելու համար ձերբակալվել էր 5 անձ:
Նախաքննությամբ պարզվել է, որ Գ.Ա.-ն, զբաղեցնելով ՀՀ ՊՆ տեղեկատվության եւ հասարակայնության հետ կապերի վարչության պետի պաշտոնը, հանդիսանալով պետական մարմնում մշտապես կազմակերպական-տնօրինչական գործառույթներ իրականացնող պաշտոնատար անձ եւ սահմանված կարգով նշանակված լինելով ՀՀ պաշտպանության նախարարության կարիքների համար 2019, 2020 եւ 2021 թվականներին կազմակերպված N ծածկագրերով թվով երեք գնման ընթացակարգերում պատասխանատու ստորաբաժանման ղեկավար, պաշտոնեական դիրքն օգտագործելով «Էլ …» ՍՊ ընկերության տնօրեն Ա.Բ.-ի հետ նախնական համաձայնությամբ, խմբի կազմում, «Նոր …» հասարակական կազմակերպության տնօրեն, «DASARAN.AM» ապրանքային նշանի սեփականատեր Ս.Ա.-ի եւ գնումների հայտերը նախագծած անձանց՝ ՀՀ ՊՆ տեղեկատվության եւ հասարակայնության հետ կապերի վարչության ՎՏԱ բաժնի պետ Կ.Պ.-ի եւ նույն վարչության գլխավոր մասնագետ Ա.Ա.-ի օժանդակությամբ, պաշտոնական փաստաթղթերում մտցրել են ակնհայտ կեղծ տեղեկություններ եւ խաբեության եղանակով, շահադիտական նպատակով, 2019-2021 թվականների ընթացքում պետությունից հափշտակել առանձնապես խոշոր չափերով՝ 106.300.000 ՀՀ դրամ:

Առերեւույթ հանցավոր արարքներ կատարելու համար 2023 թվականի սեպտեմբերի 15-ին ՀՀ նախկին քրեական օրենսգրքի 178-րդ հոդվածի 3-րդ մասի 1-ին կետով եւ 314-րդ հոդվածի 1-ին մասով մեղադրանք է ներկայացվել ՀՀ ՊՆ տեղեկատվության եւ հասարակայնության հետ կապերի վարչության նախկին պետ Գ.Ա.-ին, ՀՀ նախկին քրեական օրենսգրքի 178-րդ հոդվածի 3-րդ մասի 1-ին կետով եւ 38-314-րդ հոդվածի 1-ին մասով՝ «Էլ …» ՍՊ ընկերության տնօրեն Ա.Բ.-ին, ՀՀ նախկին քրեական օրենսգրքի 38-178-րդ հոդվածի 3-րդ մասի 1-ին կետով՝ «Նոր …» ՀԿ տնօրեն Ս.Ա.-ին, ՀՀ նախկին քրեական օրենսգրքի 38-178-րդ հոդվածի 3-րդ մասի 1-ին կետով եւ 38-314-րդ հոդվածի 1-ին մասով՝ ՀՀ ՊՆ տեղեկատվության եւ հասարակայնության հետ կապերի վարչության կազմակերպչական բաժնի պետ Կ.Պ.-ին, նույն վարչության գլխավոր մասնագետ Ա.Ա.-ին։