Հաստատվեց «Ակադեմիական քաղաքի» հայեցակարգը. Այն պատրաստ կլինի 2030-ին եւ պետք է տեղավորի մինչեւ 16 բուհ

Կառավարությունն իր այսօրվա՝ հոկտեմբերի 19-ի նիստում հաստատեց «Ակադեմիական քաղաք» ծրագրի հայեցակարգը:

ԿԳՄՍ նախարար Ժաննա Անդրեասյանը ներկայացնելով նախագիծը՝ նշեց, որ Հայաստանի մինչեւ 2030 թվականի զարգացման պետական ծրագրով նախատեսվում է, որ պետք է ստեղծվի Ակադեմիական քաղաք որպես բարձրագույն որակյալ կրթության եւ հետազոտության համար արդիական միջավայր. «Ակադեմիական քաղաքի ստեղծման անհրաժեշտությունը պայմանավորված է լավագույն ստանդարտներին համահունչ եւ միջազգայնորեն մրցունակ բարձրագույն կրթություն եւ գիտություն ունենալու, ինչպես նաեւ այս երկու ոլորտներն արդյունավետ ինտեգրելու նպատակներով:

Բուհական կրթության մեջ հետազոտական բաղադրիչի ավելացումը կապահովվի գիտելիքի և հմտությունների ձեռքբերումն ու ամրապնդումը կիրառության մեջ և իրական համատեքստում:

Ակադեմիական քաղաքը նաև երաշխավորելու է ձեռք բերված գիտելիքի լավագույն կիրառությունը` ապահովելով հետազոտությունների գերազանցության, կիրառական արդյունքների հայտնաբերման, զարգացման և դրանց փոխանցման, նորարարական գործունեության խթանման և մտավոր սեփականության պաշտպանության սկզբունքները, այսպիսով ծառայելով հանրությանը:

Նաև հանրային և մասնավոր կազմակերպությունների հետ համագործակցությամբ ապահովելու ենք ստեղծվող գիտելիքի, տեխնոլոգիաների և նորարարությունների ներդրումն ու ծառայեցումը հանրային բարեկեցությանն ու առաջընթացին:

«Ակադեմիական քաղաք» ծրագիրն իրականացնելու նպատակով այս տարվա ապրիլին ստեղծվել էր «Ակադեմիական քաղաք» հիմնադրամը»,-ասաց Ժաննա Անդրեասյանը:

Նրա խոսքով, «Ակադեմիական քաղաքի» հայեցակարգով սահմանվում են ակադեմիական քաղաք ստեղծելու նպատակները, խնդիրները, ակադեմիական քաղաքի կլաստերները, ուսանողների, դասախոսների, գիտական ու վարչական աշխատողների նախատեսվող թիվը,, այն ենթակառուցվածքները, որոնք պետք է ապահովվեն ակադեմիական քաղաքում:

«Ֆիզիկական տեղադիրքի համար նախատեսվում են երկու տեղամասեր. Երեւանի 17-րդ թաղամասին հարող տարածքը, որի գերակշռող մասը պետական կամ համայնքային սեփականություն է եւ եւ Համո Բեկնազարյանի անվան «Հայֆիլմ» կինոստուդիայի տարածքը, որոնց գումարային մակերեսը կազմում է շուրջ 700 հեկտար: Հիմնական տեղամասը լինելու է 17-րդ թաղամասին հարող տարածքը, իսկ «Հայֆիլմի» տարածքին անդրադառնալու ենք այն պարագայում, երբ գլխավոր հատակագծով դրա կարիքը լինի: Ակադեմիական քաղաքի տարածքները նախատեսվելու են այն տրամաբանությամբ, որ հնարավորություն ունենան տեղակայելու մինչեւ 16 բուհ: Օրենքով նախատեսված մինչեւ 8 պետական խոշորացված բուհեր եւ մինչեւ 8 մասնավոր կամ միջազգային բուհեր:

Այս պահին հայեցակարգում մանրամասն նկարագրված են 4 կլաստերները՝ տեխնոլոգիական, արվեստների, կրթական եւ սպայական: Ակադեմիական քաղաքը հարում է մեկ մայրուղու, այն Երեւանին կապվելու է նաեւ երկաթգծով, որի մի մասն արդեն անցնում է հիմնական տեղամասով:

Նախատեսվում է, որ ակադեմիական քաղաքի ներսում տեղաշարժը կունենա հատուկ կարգավորում՝ կազմակերպվելով հեծանիվներով, էլեկտրական տրանսպորտով եւ այլ եղանակներով:

Ընդհանուր առմամբ այստեղ աշխատելու եւ բնակվելու է մոտ 44 հազար մարդ»,-ասաց նախարարը:

Անդրեասյանը հավելեց, որ ստեղծվելու են նոր ենթակառուցվածքներ, որոնք վերաբերելու են ուսումնական հաստատությունների, հետազոտական կենտրոնների, արտադրական փորձարարական կենտրոնների շենքային ենթակառուցվածքներին, գյուղատնտեսական նշանակության փորձարարական վարելահողերին: Լինելու է հանրակացարանային կամ բնակելի թաղամաս, բազմաֆունկցիոնալ տրանսֆորմեր համերգասրահ՝ կինոթատրոնի եւ թատրոնի բաղադրիչներով: Տարբեր մարզաեձեւերի համար նախատեսված դահլիճներ, բուհական սպորտային ակումբեր: Այստեղ նախատեսվում է ունենալ նաեւ ազգային ստադիոնը՝ մինչեւ 35 հազար հանդիսատեսի հնարավորությամբ, ջրային ավազաններ, տրանսպորտային համակարգ, ավտոկայանատեղիներ եւ այլն»,-ասաց նա:

Նախարարի խոսքով, արդեն կան պայմանավորվածություններ միջազգային հեղինակավոր ճարտարապետական GMP կազմակերպության եւ կառուցապատող ընկերությունների հետ:

Ժամանակա ցույցը երեք փուլ է ունենալու՝ նախագծման փուլ, որը կսկսվի հոկտեմբերից եւ ավարտին կհասցվի 2025-ի սեպտեմբերին, կռուցման փուլ, որը փուլերով է լինելու. կսկսվի 2025-ի հոկտեմբերից եւ կավարտվի 2029-ի դեկտեմբերին: Եվ սպասարկման փուլ, որը ողջ ծավալով կսկսվի 2030-ի հունվարից»,-ընդգծեց նախարարը: