Թրամփը հերթական անգամ թիրախավորել է Մակրոնին՝ հեգնանքով խոսելով նրա անձնական կյանքի մասին

ԱՄՆ նախագահը հերթական անգամ անձնական բնույթի կշտամբանքներ է հնչեցրել իր ֆրանսիացի պաշտոնակցի հասցեին՝ այս անգամ ազգին ուղղված իր վերջին ուղերձից առաջ մասնավոր ճաշի սկզբում։ Թրամփի խոսքերի տեսանյութը կարճ ժամանակով հրապարակվել է Սպիտակ տան YouTube-ի ալիքում, սակայն հետո հեռացվել է, հայտնում է Agence France-Presse-ը։

Դոնալդ Թրամփը ծաղրել է Էմանուել Մակրոնին՝ նշելով, թե նրա կինը նրան չափազանց վատ է վերաբերվում։ Ամերիկացի նախագահը հեգնել է, ասելով, թե նա «վերականգնվում է ծնոտին ստացած հարվածից»։ Նա նկատի ունի 2025 թվականի մայիսին Վիետնամ կատարված այցի ժամանակ ինքնաթիռում եղած դեպքը։

Դոնալդ Թրամփը Ֆրանսիային մեղադրում է Իրանի դեմ պատերազմում չհամագործակցելու մեջ, քանի որ Փարիզը չի թույլատրել իսրայելական ինքնաթիռներին թռչել իր տարածքով։ «Ես ասացի՝ Էմանուել, կուզենայինք մի փոքր օգնություն ունենալ Պարսից ծոցում, նույնիսկ եթե մենք արդեն վատ մարդկանց վերացման եւ բալիստիկ հրթիռների ոչնչացման հարցում ռեկորդներ ենք սահմանում»,- ասել է Թրամփը։ Հետո փորձելով ընդօրինակել պաշտոնակցի ֆրանսիական շեշտադրությունը՝ շարունակել. «Ոչ, ոչ, ոչ… մենք չենք կարող դա անել, Դոնալդ։ Դա կարող ենք անել, երբ պատերազմը հաղթված լինի»։ Դոնալդ Թրամփը սպառնացել է  դա չմոռանալ, հաղորդում է RFI ռադիոկայանը։

Մակրոնը կասկածի տակ է դնում Իրանի դեմ հարվածների արդյունավետությունը

Էմանուել Մակրոնը, իր հերթին, ճապոնական NHK հեռուստաալիքին տված հարցազրույցում նշել է, որ Ֆրանսիան չի մասնակցում Իրանի դեմ հակամարտությանը, Ֆրանչիայի հետ «չեն խորհրդակցել» Իրանի դեմ պատերազմ սկսելու հարցում, ընդգծել է Ֆրանսիայի նախագահը։

«Միանգամայն ճիշտ է, որ Ֆրանսիան, որի հետ չեն խորհրդակցել, ԱՄՆ-ի եւ Իսրայելի կողմից սկսված այս ռազմական գործողության մաս չէ։ Բայց այստեղ ոչինչ նոր չկա, այդպես է առաջին օրվանից, ուստի զարմանալու կարիք չկա»,- ասել է Մակրոնը։

Նա քննադատել է կոշտ ուժը, որը ճգնաժամեր չի լուծում եւ կասկածի տակ է դրել Իրանի դեմ հարվածների արդյունավետությունը։

Նա կրկին «խաղաղության, լարվածության նվազեցման եւ բանակցությունների վերսկսման» կոչ է արել, որոնք միակ ուղին են, որ «կարող են լուծել հիմնարար խնդիրները»։

«Ավելի վատ չի կարող լինել, քան շաբաթներ շարունակ տարածաշրջանը ռմբակոծելը եւ այն լքելը՝ առանց նոր շրջանակային համաձայնության հասնելու։ Այն, ինչը պաշտպանում է Ֆրանսիան, հենց դա է՝ պահանջկոտ համագործակցության շրջանակ», պարզաբանել է նա։

Մակրոնը Հորմուզի նեղուցի «կարգավորված, խաղաղ, բոլոր շահագրգիռ կողմերի հետ համաձայնեցված վերաբացման» օգտին է հանդես եկել։