Արմավիրում մի քանի տասնյակ քաղաքացիներ են բերման ենթարկվել. կալանավորվել են ՀՅԴ 2 անդամներ

Արմավիրում մի քանի տասնյակ քաղաքացիներ են բերման ենթարկվել. կալանավորվել են ՀՅԴ երկու անդամներ Ալեքսան Ալեքսանյանը եւ Արամայիս Մխիթարյանը։

 Ալեքսանյանը եւ Մխիթարյանը կալանավորվել են ՀՀ ՔՕ 163-րդ հոդվածի (հավաք անցկացնելուն կամ դրան մասնակցելուն խոչընդոտելը, հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը) հատկանիշներով հարուցված քրեական գործով։

Արմավիրի ոստիկանության բաժնի մոտ են հավաքվել «Հայաստան» խմբակցության պատգամավորները։

Պատգամավոր Արծվիկ Մինասյանը լրագրողների հետ զրույցում ասաց, որ այսօր առավոտվանից իրավապահները զանգվածային խուզարկություններ են իրականացնում տասնյակ քաղաքացիների բնակարաններում.

«Մեր կուսակցության Արմավիրի մարզի Արմավիր, Էջմիածին քաղաքի եւ Բաղրամյանի գրասենյակներում են խուզարկություններ եւ առգրավումներ իրականացվել։ Նախնական տեղեկություններով՝ եւս շուրջ 5 տասնյակից ավելի անձանց փորձ են անում բերման ենթարկել։ Այստեղ չկա օրենք, այստեղ կա խուճապահար ռեժիմի ցուցաբերած վարքագիծ։ Օրենք չհարգող իշխանությունն անցել է տոտալ հարձակման՝ օգտագործելով իրավապահ ողջ համակարգը։ Զուգահեռաբար նաեւ այսօր տեսնում ենք Գյումրիում ինչ է կատարվում, ակնհայտ է, որ իշխանությունը գործադրել է նաեւ քաղաքացիական բախումներ հրահրելու իր ազգակործան սցենարը։ Մենք այլեւս գործ ունենք թուրք-ադրբեջանական հստակ օրակարգը սպասարկող, Հայաստանը ոչնչացնող իշխանությունների հետ»։