Իշխանափոխության անհրաժեշտությունը.ի՞նչ են մտածում քաղաքացիները (տեսանյութ)

«Փաստինֆո»-ն այսօր հարցախույզ է անցկացրել Երևանի բնակիչների շրջանում՝ փորձելով պարզել հանրային տրամադրությունները:

Քաղաքացիներից հետաքրքրվել ենք՝ արդյո՞ք այս պահին Հայաստանում իշխանափոխության կարիք տեսնում են:

«Փաստինֆո»-ի հարցման արդյունքները ցույց են տալիս, որ քաղաքացիների մեծ մասը իշխանափոխության անհրաժեշտություն տեսնում է , սակայն միևնույն ժամանակ չի տեսնում քաղաքական այնպիսի ուժ, որը կարողանա իշխանության գալով իրավիճակ փոխել։

Քաղաքացիներից մեկը պնդեց, որ այս իշխանությունները չեն արդարացրել ժողովրդի սպասումները ու պետք է իշխանափոխություն լինի, մեկ ուրիշը եւս դժգոհ էր, բայց քաղաքական դաշտում չի տեսնում նոր ուժի։

«Ես չեմ ասում, որ գործող կառավարության աշխատանքից շատ գոհ ենք, բայց այնպիսի ուժ չենք տեսնում ներկա պահին, որ կարողանա փոխարինել իրենց»,-ասաց հարցման մասնակից քաղաքացին։ Իսկ մյուսն էլ հավելեց.

«Ուժեր կան, բայց չեն ներկայանում, շատ լավ, ակտիվ քաղաքական ուժեր կան, բայց նրանք հոգնել են մեր ազգից, չեն ներկայանում»:

Հարցման մասնակից քաղաքացիներից միայն մեկն ասաց, որ իշխանափոխության անհրաժեշտություն չի տեսնում, ավելին՝ նորմալ է համարում Հայաստանի և Արցախի սահմաններին տիրող իրավիճակը.

«Իմ թոռը ծառայում է, ես հարցրել եմ, նորմալ վիճակ , ոչինչ էլ չկա»,-ասաց նա: