«Կցանկանայի՞ք Հայաստանն այնքան հզոր երկիր լիներ, որ Բաքվի եւ Սումգայիթի ջարդերի ժամանակ կարողանար իրեն թույլ տալ մտնել եւ ազատել նրանց․․․»․ Սարիկ Անդրեասյան

Ռեժիսոր Սարիկ Անդրեասյանն Արցախում պատերազմի օրերին ակտիվորեն աջակցում էր հայերին։ Անդրեասյանը 2020թ․-ին գրեթե ամեն օր անդրադառնում էր կոնֆլիկտին, եւ երբ Ադրբեջանը պրովոկացիայի է դիմել Արցախում, չի կարողացել լռել։ Ռեժիսորն անդրադառնալով Արցախում տիրող իրավիճակին՝ նոր գրառում է կատարել։

«Ես հարց ունեմ իմ սիրելի հայերին։ Ասացեք, իսկ դուք կցանկանայի՞ք, որ Հայաստանն այնքան հզոր երկիր լիներ, որպեսզի 80-ականների վերջին, երբ Բաքվում եւ Սումգայիթում կոտորում ու գնդակահարեում էին հարյուր հազարավոր հայերի, երկիրը կարողանար իրեն թույլ տալ մտնել եւ ազատել նրանց։ Ինչպե՞ս կարձագանքեիք, եթե Հայաստանը կարողանար փրկել իր մարդկանց մի ամբողջ գենոֆոնդը ցեղասպանությունից՝ հակառակ նրան, թե ինչ կասեին ուրիշները։ Իմ պատասխանն է՝ այո», - իր Instagram-ում գրել է Սարիկ Անդրեասյանը։

«Տագնապալի լուրեր Հայաստանից։ Ադրբեջանը կրկին զորքերը մոտեցրել է մեր սահմաններին, կրկին կրակում են, կրկին ցանկանում են աղմուկի ներքո, մինչեւ ամբողջ աշխարհը զբաղված է, օգտվել իրավիճակից եւ ինչ-որ բան խլել, ինչն իրենց չի պատկանում։ Կարդալով այդ բոլոր լուրերը՝ ես արդեն չգիտեմ, թե ինչ անել, ում գրել, ինչպես պայքարել։ Այդ ամենը ցավալի է ու տագնապալի։ Եթե հավատանք դավադրությունների բոլոր տեսություններին ու լուրերին, առհասարակ կարելի է խենթանալ։ Ինչպես հասկանում եմ, այս տարիների ընթացքում հայկական կառավարության մոտ այդպես էլ ոչ մի ծրագիր, ոչ մի մարտավարություն եւ ոչ մի որոշում չի հայտնվել։ Կարծես թե, մեզ մնում է միայն սպասել ու հուսալ»,- ավելի վաղ գրել էր Սարիկը՝ կցելով որդիների հետ լուսանկարն՝ արված «Զվարթնոց» օդանավակայանում։