Ամենօրյա շփում Սերժ Սարգսյանի հետ չունեմ. եթե լուրջ հարց կա, կարող եմ զանգել, քննարկել. Ռոբերտ Քոչարյան

Սերժ Սարգսյանը և Ռոբերտ Քոչարյանն Արցախի նախկին երկու նախագահների՝ Բակո Սահակյանի և Արկադի Ղուկասյանի հետ, մոտ երկու ժամ քննարկել են Արցախի հարցը՝ ինչ կարելի է անել, ինչ լուծումներ այնտեղ գտնել, անձնական հարցեր չեն քննարկել: Հրավիրված ասուլիսի ժամանակ այս մասին տեղեկացրեց Արցախի և ՀՀ-ի նախկին նախագահ Ռոբերտ Քոչարյանը:

«Բոլորս մտահոգված ենք»,- շեշտեց նա:

Ինչ վերաբերում է «Պատիվ ունեմ» և «Հայաստան» խմբակցությունների համագործակցությանը, Քոչարյանը նշեց, որ կան հարցեր, որտեղ հայացքները տարբեր են, բայց ի վիճակի են ինչ-որ լուծումների հանգել:

«Կարծում եմ՝ չնայած բոլոր հակասություններին, կամ նախկինից կուտակված պրոբլեմներին, պետք է ի վիճակի լինել պայմանավորվել կարևոր հարցերի շուրջ: Անձերի հարց այստեղ ես չեմ տեսնում: Պետք է կարողանանք սկզբունքային հարցերի շուրջ ձեռք բերել պայմանավորվածություններ: Հատուկ լայնածավալ շփումներ չունեմ, եթե կա ինչ-որ քննարկման հարց, կարող ենք զանգել և իրար հետ խոսել»,- ասաց Քոչարյանը՝ անդրադառնալով իր և Սերժ Սարգսյանի հարաբերություններին: