Բացառված է, որ Ղազախստանում իշխանության գան հակառուսական ուժեր․ Լեոնիդ Կալաշնիկով

Ղազախստանի ղեկավարությունն ամենայն հավանականությամբ կկարողանա կարգավորել իրադրությունը եւ հակառուսական ուժերը դժվար թե կարողանան գալ իշխանության։ Այս մասին հայտարարել է Ռուսաստանի Պետդումայի՝ ԱՊՀ երկրների հետ գործերի, եվրասիական ինտեգրացիայի եւ հայրենակիցների հետ հարցերով կոմիտեի նախագահ Լեոնիդ Կալաշնիկովը։

«Ես նույնիսկ դա հնարավոր չեմ համարում։ Աշխարհում իրավիճակը փոխվել է։ Մենք հիանալի հասկանում ենք, թե ինչ նշանակություն ունի Ղազախստանը մեզ համար։ Դա մեր ամենակերկար ձգվածություն ունեցող սահմանն է։ Ու ես կարծում եմ, որ գործը դրան չի հասնի»,- ասել է ռուս պատգամավորը, ի պատասխան այն հարցի, թե արդյոք չկա վտանգ, որ Ղազախստանում կարող են իշխանության գալ հակառուսական ուժերը։ Կաշանիկովը հույս է հայտնել, որ տեղում իշխանությունները կկարողանան իրավիճակը կարգավորել։

Կալաշնիկովը նշել է, որ նախապես բողոքի ալիքը սկսվեց գազի թանկացումից, որից կայծակնային արագությամբ օգտվեցին նրանք, ովքեր ցանկանում էին ապակայունացնել իրադրությունը Ղազախստանում։