Ի՞նչ կապ ունի գեներալ Սեյրան Սարոյանը «Իգլա»–ի գործով մեղադրյալի հետ

«Փաստ» օրաթերթը գրում է. Կենտրոն և Նորք–Մարաշ վարչական շրջանների ընդհանուր իրավասության դատարանում սեպտեմբերի 11–ին «Իգլա»–ի գործով հարցաքննվել է կասկածյալ Հրաչյա Մայիլյանը, ով այս գործից անջատված մասով նաև մեղադրյալ է: Մայիլյանը հայտնել է, որ Թբիլիսիում զբաղվել է ձեռնարկատիրությամբ,որի մասին շատ լավ գիտեր իր ծանոթ Արմեն Պողոսյանը, ով Էջմիածնում հայտնի է «Ժորիկ» անունով: Պողոսյանը իրեն խնդրել է հետաքրքրվել Վրաստանից «Իգլա» տեսակի զենք ձեռք բերելու հնարավորությունների մասին: «Չգիտեի՝ ի՞նչ զենքի մասին է խոսքը: Ժորիկն ասաց, որ դա տանելու է Ղարաբաղ՝ բանակին, որ պաշտոն տան, իսկ թե ում՝ չգիտեմ: Հետո պարզվեց, որ «Իգլան» պետք է եղել Սանասար Գաբրիելյանին: Դիմեցի ծանոթիս, որն ասաց, որ իրենց մոտ նման զենք չկա»,– ասել է Հրաչյան նախաքննական ցուցմունքում:
Վկան նշեց, որ Ժորիկը իրեն ծանոթացրել է Ռոբերտի հետ, ով ասել է, թե կարող է ուզած զենքը գտնել: «Արշալույս գյուղի դաշտերից մեկում Ռոբերտը ցույց տվեց խողովակատիպ մի սարք: Զենքը թողել ենք նույն տեղում և վերադարձել Էջմիածին: Ռոբերտն ասաց, որ զենքն արժի 40000 ԱՄՆ դոլար, սակայն վրան պակաս մասեր կան ու 35 հազար դոլարով կարող ենք գնել»: Ավելի ուշ Հրաչյա Մայիլյանը «Իգլան» տարել ու պահել է իր հանգուցյալ հորեղբոր տանը, սակայն Ժորիկը հրաժարվել է զենքը գնելուց՝ պատճառաբանելով, որ անհրաժեշտ մասեր են բացակայում:
«Այ ստեղ հասկացա, որ Ժորիկն ու Սանոն ինձ կոճկել են: Ինձ կեղծ փաստաթղթեր օգտագործելու փաստով հրավիրել էին ԱԱԾ, այդ ժամանակ էլ որոշեցի պատմեմ կատարվածի և «Իգլա»–ի մասին»,– նշեց մեղադրյալը: Գործով վկա, ՕՐՕ դաշինքի Էջմիածնի գրասենյակի համակարգող Սուսաննա Հարությունյանը «Փաստ»–ի թղթակցի հետ զրույցում նկատեց. «Սանոն հազար տարի գեներալ Սեյրանի մոտ է աշխատել: Սամվել Բաբայանը չէր կարող նրա հետ կապ ունենալ: Ես գեներալիտետի աչքի փուշն եմ, բայց արդարության կողմն եմ: Դէ հիմա հասկացեք «Իգլա»–ի հետքերը որ ուղղությամբ են գնում: Սանոն՝ Սարոյան Սեյրանի մարդկանցից ա, սա Էջմիածնում բոլորը գիտեն»:
Մանրամասները՝ «Փաստ» օրաթերթի այսօրվա համարում