Հայաստանը 2-րդն է զբոսաշրջային ուղղությունների ցանկում, որտեղ ռուսաստանցի զբոսաշրջիկներն ամենաքիչն են բախվում լեզվական խոչընդոտի

Մոլդովան դարձել է այն զբոսաշրջային ուղղությունը, որտեղ ռուսաստանցի զբոսաշրջիկներն ամենաքիչն են բախվում լեզվական խոչընդոտի, այս մասին lenta.ru-ին պատմել է Aviasales զբոսաշրջային ընկերության PR տնօրեն Յանիս Դզենիսը:

Ընկերության մասնագետները նման եզրակացության են եկել՝ վերլուծելով Ռուսաստանից արտասահման ավիատոմսերի ամրագրման տվյալները։

Երկրորդ տեղում է Հայաստանը, եռյակը եզրափակում է Վրաստանը: Չորրորդ տեղը բաժին է հասել Ուզբեկստանին, հինգերորդը՝ Ղրղզստանին: Լավագույն տասնյակում տեղ են գտել նաև, համապատասխանաբար, Ադրբեջանը, Բուլղարիան, Ղազախստանը, Բելառուսը և Ուկրաինան:

Aviasales-ի փորձագետները նաև հարցում են անցկացրել՝ պարզելով այն երկրները, որտեղ ռուսաստանցիներն առհասարակ գրեթե չեն հանդիպում լեզվական խնդիրների: Այս ցուցակում 35 տոկոսով առաջատար է Ուկրաինան:

Բացի այդ, հարցվածների 11 տոկոսը լեզվական խոչընդոտների չի հանդիպել նաև Թաիլանդում, 10 տոկոսը՝ Թուրքիայում: Չնայած տվյալ երկրներում օգտագործվող լեզուների և ռուսերենի խիստ տարբերությանը, զբոսաշրջիկներն այստեղ նման խնդիրների չեն բախվում տուրերի ճիշտ ու համակարգված կազմակերպվածության պատճառով, իսկ մի շարք հյուրանոցներում հատուկ աշխատակազմը կարողանում է շփվել ռուս զբոսաշրջիկների հետ:

Ընդհանուր առմամբ, արտերկիր հանգստի մեկնող ՌԴ քաղաքացիների 19 տոկոսը խնդիրներ է ունեցել արտասահմանյան օդանավակայաններում, 18 տոկոսը՝ հյուրանոցներում, 15 տոկոսը՝ սահմանային անցակետերում, 14 տոկոսը՝ ռեստորաններում: