Փյունիկի դպրոցը չի փակվի.աշակերտները վաղվանից կգնան դպրոց

Սեպտեմբերի 11-ին, Կոտայքի մարզի Փյունիկ համայնքի դպրոցականներն ու նրանց ծնողները գնացել էին կառավարություն՝ իրենց դժգոհությունը հայտնելու կառավարության՝ օգոստոսի 24-ի որոշման դեմ, որով Փյունիկ համայնքի դպրոցը միավորվելու է հարեւան Արտավազ համայնքի դպրոցի հետ:

Հիշեցնենք, որ սեպտեմբերի 1-ից Փյունիկի շուրջ 42 աշակերտներ իրենց ծնողների հետ բոյկոտել են կառավարության որոշումը եւ մինչ այսօր աշակերտները դպրոց չեն հաճախել:

«Ծնողներին կառավարությունից ընդունել է ինչ-որ մեկը, ծնողներն ասացին, որ աշխատակազմի աշխատակից էր, լսել է նրանց դժգոհությունը եւ հայտնել, որ հարցը կլուծվի, դպրոցը չի փակվի եւ որ վաղվանից երեխաները հանգիստ հաճախեն իրենց հարազատ դպրոց»,-NEWS.am-ի հետ զրույցում ասաց Փյունիկի գյուղապետ Ռեմ Հովհաննիսյանը:

Մեր թղթակիցը կապ հաստատեց նաեւ Փյունիկի դպրոցի տնօրեն Մարաբյանի հետ: Նա էլ նշեց, որ վաղվանից աշակերտները բնականոն կհաճախեն դպրոց։ «Ինչ-որ ասել են, որ գործընթացը կկասեցնեն եւ երեխաներն էլ պետք է հաճախեն դպրոց..-նշել է տնօրենը:

Նշենք, որ շուրջ մեկ շաբաթ է Կոտայքի մարզի Փյունիկ համայնքի դպրոցականները դասադուլ են անում. նրանք սեպտեմբերի 1-ից դասի չեն հաճախում: Բանն այն է, որ կառավարության՝ օգոստոսի 24-ի որոշմամբ, Փյունիկի դպրոցը վերամիավորվելու է հարեւան Արտավազ գյուղի դպրոցի հետ, այսինքն՝ Փյունիկի դպրոցը երկու ամսից փակվելու է ու դպրոցի 42 աշակերտներներ պիտի հաճախեն հարեւան գյուղի դպրոց:Կառավարության որոշման դեմ բողոքել են ծնողներն ու աշակերտները՝ նշելով, որ դպրոց փակելով մեծ խնդիրներ են առաջանում:Հարեւան Արտավազը շատ հեռու եւ դժվարանցանելի հատկապես ձմռան ամիսներին: Փյունիկի դպրոցն այս տարի ունի 9 առաջին դասարանցի, ովքեր մյուս աշակերտների պես արդեն 10 օր դպրոց չեն գնացել: