Իշխանությունները Առուշանյանի գլխին սարքեցին, կարեցին, գցեցին ջեբը. Շուռնուխի գյուղապետի եղբայր

Ակնկալիքներ ունենք դատարանից, վերջիվերջո, մարդկային մեխանիկան պետք է աշխատի, եւ էդ տղին (նկատի ունի Առուշ Առուշանյանին-խմբ) ազատ արձակեն: Այս մասին, այսօր՝ նոյեմբերի 5-ին, Սյունիքի մարզի ընդհանուր իրավասության դատարանի Գորիսի նստավայրի մոտ լրագրողների հետ զրույցում նշեց Շուռնուխ համայնքի ղեկավարի եղբայր Արարատ Աղաբեկյանը (Աշխարհաբեկ):

Նշենք, որ դատարանում քննվում է Գորիսի քաղաքապետ Առուշ Առուշանյանի տեսակցությունների արգելքը հանելու, նաեւ խափանման միջոցը փոխելու հարցը;

«Թե ինչ է եղել, բոլորին քաջ հայտնի է, կարիք չկա մեր տղուն էնդքան պահեն երկար ժամանակ: Բոլորս հասկանում ենք, թե սրանք ինչիծ ծնված բաներ են: Թող դադար տան: Մենք էլ արժեք ունենք, որ կարողացել ենք մեր արժեքներով ընտրենք մեր արժանապատիվին:

Միգուցե իշխանությունները վախենում են, դա էլ է բնորոշ բան: Հետո մարդն ինչքան վախենում է, այնքան իր վախից ավելի շատ ավելորդություններ է թույլ տալիս:

Ամեն ինչ էդքան փնովեցին, կարեցին, գցեցին ջեբը, ու ինձ համար ամենաչներելին այն է, որ կանգեցին, ասեցին՝ Առուշանյանը մարտական գործողություններին չի մասնակցել, Ջաբրայիլում չի եղել: Գոնե դա չասեին: Ու տենց քանի՞ հրամանատարների գլխին սարքեցին, կարեցին, գցեցին ջեբները: Դա մեր արժեքն է, մարդն արել է, գոնե իր արածը մի հերքեք: Կարճամիտ քայլեր են անում»,-ասաց նա:

Արարատ Աղաբեկյանը հավելեց, որ եթե եղանակը լավ լինի, կտանի ցույց կտա Քաչալ սարը, թե ինչպես է թուրքն ամրապնդվել այնտեղ. «Վաղն էլ կարող են գալ մյուս սարում նստեն: Մեկը չկա այդ հարցերով զբաղվի: Եթե իշխանություններին լսես, էս մեր կանգնած տեղն էլ է ադրբեջանական: Կարող է հիմա օրենք հանեն, որ ովքեր զենք են վերցրել, որ գնան եղբայրական Ադրբեջանի դեմ զինված ոտնձգություն անի, կալանավորել 7-9 տարի, ովքեր զենք են վերցրել, բայց չեն գնացել՝ 5 տարի, իսկ ովքեր խուսափել են ծառայությունից, նրանց էլ կողմից պետության կողմից աջակցություն 10 հազար դոլար:

Հնարավոր չէ թուրքի հետ համատեղ անվտանգ ապրել: Դեռ սովետական ժամանակ, տարիներ շարունակ, երբ Գորիս-Կապան ճանապարհով «ՊԱԶ» ավտոբուսը գնում էր, թուրքի լակոտը քարով խփում էր: Բա էսօր ի՞նչ կանի»,- ասաց նա:

Շուռնուխի գյուղապետի եղբայրը հայտարարեց, որ Առուշ Առուշանյանի ազատ արձակման ստորագրահավաքի ժամանակ եկել եւ ստորագրել են շատ մարդիկ, որոնք ընտրություններին ձայն են տվել ՔՊ-ին. «Այսինքն իրենց ուղեղում ռեստարտ են արել»: