Հյուսիսային Մակեդոնիայի վարչապետը հայտարարել է, որ հրաժարական կտա

Հյուսիսային Մակեդոնիայի վարչապետ Զորան Զաեւը հայտարարել է, որ հրաժարական կտա եւ կլքի «Մակեդոնիայի սոցիալ-դեմոկրատական ​​միություն» կուսակցությունը։ Քաղաքական գործչի հայտարարությունը հեռարձակվել է կուսակցության ֆեյսբուքյան պաշտոնական էջում, հայտնում է ՏԱՍՍ-ը։

«Ես հրաժարվում եմ վարչապետի եւ Մակեդոնիայի սոցիալ-դեմոկրատական ​​միության նախագահի պաշտոններից», -ասել է նա։ «Հպարտ եմ, որ մենք երկիրը մտցրել ենք ՆԱՏՕ-ի դաշինք»,-հավելել է քաղաքական գործիչը։

Միաժամանակ Զաեւն ասել է, որ անհրաժեշտ չի համարում արտահերթ խորհրդարանական ընտրությունների անցկացումը եւ նշել է, որ կկատարի վարչապետի պարտականությունները մինչեւ նոր կաբինետի ձեւավորումը։ «Ես կմնամ [վարչապետի պաշտոնակատար] այնքան ժամանակ, որքան կպահանջվի օգնել վերակազմավորել նոր կառավարությունը առաջադեմ մեծամասնությամբ, որը կա եւ դեռ կարող է աճել»,-ասել է նա։

Զաեւի հրաժարականի մասին հայտարարությունը հնչել է Հյուսիսային Մակեդոնիայի մունիցիպալ ընտրությունների արդյունքների ամփոփումից հետո, որոնցում ընդդիմությունը հաջողությունների է հասել։ Քաղաքական գործիչը շնորհավորել է իր հակառակորդներին հաղթանակի կապակցությամբ եւ ասել, որ «ընդունում է պատասխանատվությունը քաղաքական իրադարձությունների, այդ թվում՝ ընտրությունների արդյունքների նման զարգացման համար»։