Ո՞վ է պատասխանատու Ախուրյանի ջրամբարում տեղի ունեցածի համար

Ախուրյանի ջրամբարում ջրի մակարդակի իջնելու հետեւանքով ձկների սատկելու դեպքով անհրաժեշտ է գիտական ուսումնասիրություն կատարել եւ պարզել, թե որ երկիրն է խախտել օրենքը: NEWS.am-ի հետ զրույցում նման կարծիք հայտնեց բնապահպան Կարինե Դանիելյանը:

«Իմ կարծիքով, ոչ այդքան օրենսդրական բացթողումներ կան, այլ գործող օրենքները չեն գործում, մնում են թղթի վրա, իսկ մարդիկ առաջնորդվում են իրենց ֆինանսական շահերով: Հիմա պետք է լուրջ ուսումնասիրություն անել, եթե երկու երկիր է օգտագործում, ո՞ր մեկն է անցել սահմանը: Իհարկե, փաստորեն այն էկոլոգիական նվազագույնը, որ ջրամբարում պետք է մնա, ճիշտ չի ֆիքսված կամ խախտված է: Շատ տեղերում ամեն ինչ ֆիքսված կա, բայց իրականությունն ու օրենքի մակարդակը լրիվ տարբերվում են եւ շատ հեռու են իրարից»,- ասաց Կարինե Դանիելյանը:

Նշենք, որ բնապահպանության նախարար Արծվիկ Մինասյանը նախօրեին լրագրողների հետ զրույցում խոստովանել է, որ օրենսդրական լուրջ բացթողումներ կան:

«Ախուրյանի ջրամբարը Հայաստանի եւ Թուրքիայի կողմից օգտագործվող արհեստական ջրավազան է: Այն՝ որպես կենսաբազմազանության պահպանման վայր հաշվառված չի եղել: Ջրամբարի հիմնական նպատակն է եղել Հայաստանի ու Թուրքիայի համար ոռոգում ապահովելը: Ցավոք, Ախուրյանի ջրամբարը նաև ջրօգտագործման թույլտվության համակարգ չունի՝ նորից պայմանավորված կարգավիճակի առանձնահատկությամբ: Մենք տվել ենք թույլտվություն արդյունագործական ձկնորսության համար: Մենք առաջարկել ենք ստեղծել միջգերատեսչական հանձնաժողով, որպեսզի կարողանանք գնահատել ջրամբարի կարգավիճակը, ջրամբարից ջրառ իրականացնելու ամբողջական կանոնները, ամբողջ այդ հատվածում ջրային ռեսուրսների արդյունավետ օգտագործման համակարգը, որպեսզի ապահովվի էկոլոգիական հավասարակշռություն: Բավական լուրջ թերի օրենսդրություն ունենք, որոնք պետք է առաջիկայում շտկել»,- ասել էր նախարարը:

Հիշեցնենք, որ Ախուրյանի ջրամբարի ջրի մակարդակն իջել է, որի հետեւանքով բազմաթիվ ձկներ են սատկել: Ջրային տնտեսության պետական կոմիտեի մամուլի ծառայության փոխանցմամբ, Ախուրյանի ջրամբարում ձկնաբուծություն իրականացվել է ինքնագործունեության հիմունքներով, որի համար ՋՏՊԿ-ն երբեւէ համապատասխան թույլտվություն կամ համաձայնություն չի տվել, եւ, բնականաբար, որեւէ պատասխանատվություն չի կրում ստեղծված արհեստական ջրային համակարգերում գոյություն ունեցող ձկնատեսակների պահպանության համար: Ջրամբարից ՀՀ տարածքում ոռոգվում է Արմավիրի եւ Շիրակի մարզերի շուրջ 30 հազար հա հողատարածք, որոնց ջրապահանջը կազմում է 327,5 մլն խ/մ: Այս տարի ջրամբարում ջրի առավելագույն ծավալը կազմել է 444.28 մլն խ/մ՝ անցյալ տարվա 545,75 մլն խ/մ դիմաց: Այս պահի դրությամբ ջրամբարից թողնվել է 305.21 մլն խ/մ ջուր՝ ներառյալ գետի ջրատվությունը:

Բնապահպանության նախարարությունն ուսումնասիրություն է կատարում: