Ասա, ով է սանիկդ. Տարոն Մարգարյանի սանիկը գրադարանավարից դարձել է ՀՈԱԿ-ի տնօրեն

«Հայկական ժամանակ» թերթը գրում է. «Նախօրեին գրել էինք Երեւանի քաղաքապետ Տարոն Մարգարյանի մորաքրոջ դստեր`դեռեւս 2011 թվականին կատարված նշանակման մասին: Քաղաքապետարանից մեզ հայտնել էին, որ թիվ 57 մանկապարտեզ-հիմնարկն ընդգրկված է «Ավանի մանկապարտեզներ» ՀՈԱԿ-ի կազմում՝ ի թիվս 7 այլ մանկապարտեզ-հիմնարկների, որոնց ղեկավարներին եւ մնացած բոլոր աշխատողներին նշանակում եւ ազատում է ՀՈԱԿ-ի տնօրենը:

Այս տեղեկությամբ ստացվում է, որ Տարոն Մարգարյանն ընդհանրապես կապ չի ունեցել եւ չէր կարող ունենալ այդ նշանակման հետ: Սակայն եթե մի փոքր ուսումնասիրում ենք հանգամանքները, ամեն բան իր տեղն է ընկնում:

«Ավանի մանկապարտեզներ» համայնքային ոչ առեւտրային կազմակերպությունը (ՀՈԱԿ) ստեղծվել է դեռեւս 2006 թվականին: Երեւանի ավագանու 2011 թվականի փետրվարի 8-ի որոշումով էլ Երեւանի քաղաքապետարանի անմիջական ենթակայության տակ գտնվող կազմակերպությունները հանձնվել են վարչական շրջանների ենթակայությանը: Այդ կազմակերպությունների ցանկում են եղել «Ավանի մանկապարտեզներ» ՀՈԱԿ-ի թիվ 51, 52, 53, 54, 55, 56, 57 մանկապարտեզ հիմնարկները: Եվ երբ տեղեկանում ենք, թե ով է «Ավանի մանկապարտեզներ» ՀՈԱԿ-ի տնօրենը, որն էլ իր հերթին լիազորված է նշանակումներ կատարել իր ենթակայության տակ գտնվող մանկապարտեզների ղեկավար կազմերին եւ մյուս աշխատակիցներին, ամեն ինչ ավելի է ընդգծվում:

Armtimes.com-ին հայտնի դարձավ, որ «Ավանի մանկապարտեզներ» ՀՈԱԿ-ի տնօրեն Լուսինե Պողոսյանը Երեւանի քաղաքապետ Տարոն Մարգարյանի սանիկն է, իսկ Պողոսյանի ամուսինը՝ Տիգրան Մուրադյանը, քաղաքապետի ընկերն է: Նույն աղբյուրի փոխանցմամբ, վերջինս աշխատում է «Գազպրոմ-Արմենիա» ընկերությունում:

Եթե Տարոն Մարգարյանի սանիկը ՀՈԱԿ-ի տնօրենն է, ապա ինչո՞ւ չպետք է քաղաքապետի մորաքրոջ դուստրն էլ լինի մանկապարտեզ հիմնարկի ղեկավարը:

Երեւանի ավագանու ՀՀԿ-ի քարոզարշավի համար բացված կայքում տեղադրված Լուսինե Պողոսյանի կենսագրականից տեղեկանում ենք, որ վերջինս ծնվել է 1972թ. մարտի 13-ին: Սովորել է Խաչատուր Աբովյանի անվան մանկավարժական համալսարանի կուլտուրայի բաժնում՝ սոցիալ-մշակութային գործունեության կառավարում մասնագիտությամբ: 2011թ.-ից աշխատում է «Ավանի մանկապարտեզներ» ՀՈԱԿ-ում՝ որպես տնօրեն: 2007թ.-ից Հայաստանի հանրապետական կուսակցության անդամ է:

Ուշագրավ է, որ Լուսինե Պողոսյանի կենսագրականից բացակայում է գրադարանավար աշխատած տարիների մասին տեղեկությունները: Իսկ «Ավանի մանկապարտեզներ» ՀՈԱԿ-ի տնօրեն նշանակվելու տարեթիվը խոսուն է, քանի որ 2011 թվականին նա ընդունվելով աշխատանքի առաջին գործերից մեկը, որ եղել է Տարոն Մարգարյանի մորաքրոջ դստերն աշխատանքի տեղավորելն է եղել»:

Մանրամասները՝ թերթի այսօրվա համարում