Ռեստորանում 25-ամյա երիտասարդին սպանելու մեջ կասկածվողը նրա ազգականն է. նոր մանրամասներ

Երեւան-Արտաշատ ճանապարհի սկզբնամասում գտնվող «Կոնտինենտալ» ռեստորանում սեպտեմբերի 4-ի գիշերը 25-ամյա երիտասարդին դանակի մահացու հարված հասցնելու մեջ կասկածվողը նրա ազգականն է:

ըստ նախնական տեղեկությունների, Ստեփան Մինասյանը մասնակցում էր հորեղբոր դստեր հարսանիքին, իսկ նրան դանակահարելու մեջ կասկածվողը նրա հեռու ազգականն է: Հարսանիքից հետո բարեկամներով դուրս են եկել տաքսի կանգնեցնելու, երբ կասկածյալը հարձակվել է եւ նախ դանակահարել Ստեփանի մորեղբորը, ապա սկսված վիճաբանության ժամանակ դանակով երկու անգամ հարվածել Ստեփանի սրտին, ինչի հետեւանքով նա ավելի ուշ հիվանդանոցում մահացել է: Ստեփանի մորեղբայրը նույնպես դանակի երկու հարված է ստացել, նա գտնվում է հիվանդանոցում: Թե ինչից է սկսվել վիճաբանությունն ու դանակահարությունը, հայտնի չէ: Տեղեկություններ կան, որ կասկածյալը եղել է թմրանյութի ազդեցության տակ:

Ըստ Քննչական կոմիտեի տարածած հաղորդագրության՝ քննությամբ փաստական տվյալներ են ձեռք բերվել, որ տուժողները սեպտեմբերի 3-ին մասնակցել են հարսանյաց հանդեսի, որի ավարտից հետո՝ ժամը 00:10-ի սահմաններում, 21-ամյա երիտասարդը ռեստորանի բակում դանակով մեկ անգամ հարվածել է Ս.Մինասյանի մորեղբորը՝ Ե.Հայրապետյանին, ինչը նկատելով՝ Ս. Մինասյանը վազել է նրա հետևից։ Նրանց հետևից է վազել նաև Ս.Մինասյանի հայրը, որը որդուն Նորագավիթ թաղամասի 1-ին փողոցի հատվածում հայտնաբերել է դանակահարված, և նրան անմիջապես տեղափոխել են հիվանդանոց, սակայն կյանքը փրկել չի հաջողվել։

Քրեական գործով` Ս.Մինասյանը և Ե.Հայրապետյանը ճանաչվել են տուժող, 21-ամյա երիտասարդը ձերբակալվել է: