Ուկրաինայի պետական պարտքը գերազանցել է 76 միլիարդ դոլարը

Ուկրաինայի պետական պարտքը 2017 թվականի հուլիսի 31-ի դրությամբ ավելացել է 1,05 միլիարդ դոլարով (1,39 տոկոսով)՝ հասնելով 76,06 միլիարդ դոլարի: Այդ մասին հայտնել է երկրի ֆինանսների նախարարությունը, գրում է segodnya.ua-ն։

Նշվում է, որ պետական և պետությունից երաշխավորված պարտքը կազմել է 1,971 տրիլիոն գրիվնա նախորդ ամսվա 1,957 տրիլիոնի դիմաց: Գերատեսչությունում պարզաբանել են, որ այդ գումարի մեծացումը դոլարային համարժեքով կապված է գրիվնայի պաշտոնական փոխարժեքի փոփոխության հետ:

Սեպտեմբերի 5-ին Ուկրաինայի վարչապետ Վլադիմիր Գրոյսմանը հայտարարել է, որ երկիրն ամեն տարի արտաքին պարտքերի սպասարկման համար ծախսում է ավելի քան 100 միլիարդ գրիվնա (մոտ 3,8 միլիարդ դոլար): Ուկրաինայի ազգային բանկի ղեկավարի տեղակալ Օլեգ Չուրին պատմել է, որ մինչև 2019 թվականի վերջ Կիևը պետք է 12,8 միլիարդ դոլար վճարի արտաքին պարտավորություններով: