Կնոջը սիրեկանի հետ բռնացրած ամերիկացուն 15 տարվա ազատազրկում է սպառնում

Ամերիկացուն, որը բռնացրել էր կնոջը սիրեկանի հետ, 15 տարվա ազատազրկում է սպառնում։ NYP-ի փոխանցմամբ, Նյու Ջերսիի բնակիչը, գործածելով Find My iPhone հավելվածը փորձել է իր կորցրած գաջետը գտնել, սակայն փոխարենը գտել է իր մերկ կնոջը՝ նրա տնօրենի գրկում։

Սակայն հիմա նրան սպառնում է ազատազրկում՝ ապօրինի լրտեսման ու կողոպուտի համար։ Անցած տարվա ապրիլին նրա կինը՝ Նենսին ասել է, որ գնում է ընկերուհիների հետ հանդիպման։ 37-ամյա Շոն Դոնիսը որդու հետ գնացել է տատիկի տուն ու հայտնաբերել, որ որդին մոռացել է իր iPad-ը։ Այդ ժամանակ նա միացրել է Find My iPhone հավելվածը ու ի զարմանս իրեն՝ հայտնաբերել, որ գաջետը ոչ թե տանն է, այլ բոլորովին այլ վայրում։ Շոնը գնացել է նշված հասցեով ու հայտնաբերել իր կնոջ մեքենան ինչ –որ մասնավոր տան բակում։ Տան դուռը բաց է եղել, Շոնը ներս է մտել ու տեսել կնոջը նրա սիրեկանի՝ տնօրենի հետ։ Այդ տեսարանը Շոնը տեսագրել է։ Տեսանյութում երեւում է, որ վախեցած սիրեկանները փորձում են թաքնվել ու խնդրում են դադարեցնել նկարահանումը։ «Ամեն ինչ տեսագրվում է։ Ես աչքերիս չեմ հավատում, Նենսի։ Չեմ կարողանում հավատալ»,- ասում է Շոնը։

Շուտով ամուսինները բաժանվել են, սակայն հուլիսին Շոնը ծանուցագիր է ստացել այն մասին, որ իրեն մեղադրում են ուրիշի տուն ներխուժելու ու ապօրինի լրտեսման մեջ։ Նա իրեն մեղավոր չի ճանաչում ու պետք է կանգնի դատարանի առաջ սեպտեմբերի 20-ին։

Փաստաբանը վստահ է, որ Շոնը կհաղթի դատավարությունը։

 NEWS.am