Էրդողանի հետ խոսելը քեզ համար պատիվ է. թուրք նախարարը պատասխանել է Ֆրանսիայի նախագահին

Թուրքիայի էկոնոմիկայի նախարար Նիհաթ Զեյբեկչին մեկնաբանել է Ֆրանսիայի նախագահ Էմանուել Մակրոնի խոսքերը Թուրքիայի նախագահ Ռեջեփ Թայիփ Էրդողանի մասին, գրում է թուրքական diken.com.tr կայքը:

Մակրոնը բրիտանական Reuters գործակալությանը տված հարցազրույցում խոստովանել էր, որ աշխարհի առաջնորդներից մեկը լինելն այդքան էլ զիլ բան չէ, ինչպես շատերն են պատկերացնում: Մակրոնը, մասնավորապես, օրինակ է բերել, որ ստիպված է լինում 10 օրը մեկ շփվել Թուրքիայի նախագահ Ռեջեփ Թայիփ Էրդողանի հետ:

«Դա բնավ էլ զիլ բան չէ: Այդ ես եմ, որ ստիպված եմ տասն օրը մեկ հեռախոսազրույց ունենալ Էրդողանի հետ», - ասել է Մակրոնը:

Թուրք նախարարը, քննադատելով Ֆրանսիայի նախագահին, հայտարարել է, որ Մակրոնն Էրդողանի հետ շփվելը պետք է որպես մեծ պատիվ ընդունի:

«Մի՛ մոռացիր, որ Ռեջեփ Թայիփ Էրդողանի հետ խոսելը քեզ համար պատիվ է», - ասել է Զեյբեկչին:

Նա նաև համբերություն է մաղթել Էրդողանին Մակրոնի նման «դաստիարակության սահմաններն անցնողների» հետ շփվելու հարցում:

«Այն դեպքում, երբ մենք մի կերպ ենք դիմանում, նա (Էրդողանը) համբերում է: Կգա մի օր, որ ձեր հուշերում հպարտությամբ կպատմեք, որ խոսել եք Էրդողանի հետ», - ասել է թուրք նախարարը:

tert.am