Չինաստանի տնտեսությունը աշխարհում խոշորագույններից առաջինն է սկսել աճել՝ համավարակի պատճառով անկումից հետո

Չինաստանի տնտեսությունն առաջինն է աշխարհում, որը սկսել է աճել համավարակից հետո: Չինաստանի ՀՆԱ-ն երկրորդ եռամսյակում տարեկան կտրվածքով աճել է 3,2%-ով, գրում է Forbes-ը:

Չինաստանի տնտեսությունն առաջինն է աշխարհի խոշորագույն երկրներից, որը սկսեց աճել` կորոնավիրուսային վարակի տարածման հետեւանքով առաջացած անկումից հետո: «Չինաստանի ՀՆԱ-ն 2020 թվականի առաջին եռամսյակում տարեկան կտրվածքով ընկել է 6,8%-ով, իսկ երկրորդ եռամսյակում աճել է 3,2%-ով»,- ասվում է Չինաստանի վիճակագրության ազգային բյուրոյի հաղորդագրության մեջ:

Չինաստանում արդյունաբերական արտադրությունը հունիսին աճել է 4,8%-ով՝ նախորդ տարվա հունիսի համեմատ: Քաղաքային բնակչության շրջանում գործազրկության մակարդակը մայիս ամսվա 5,9%-ից հունիսին իջել է մինչեւ 5,7%:

«Երկրորդ եռամսյակի աճով Չինաստանը կարծես թե պայծառ կետ է համավարակի պատճառով ավերված աշխարհում»,- նշել է Wall Street Journal-ը: Թերթը հիշեցրել է, որ Արժույթի միջազգային հիմնադրամի կանխատեսմամբ՝ ամբողջ տարվա ընթացքում Չինաստանի տնտեսությունը կաճի 1,2%-ով, ինչը Չինաստանը կդարձնի միակ խոշոր տնտեսական տերությունը, որը աճի է հասել 2020-ին:

Հեռանկարները կարող են խաթարվել ԱՄՆ-ում շարունակվող անկմամբ, որը Չինաստանի ամենամեծ արտահանման շուկան է, եւ համաշխարհային տնտեսության մեծ մասի կաթվածահարությամբ, որտեղ դեռ արձանագրվում են կորոնավիրուսի նոր դեպքերի աճ, նշում է թերթը: Բացի այդ, Չինաստանն այժմ բախվում է խոշոր ջրհեղեղների, այդ թվում՝ երկրի կարեւորագույն արդյունաբերական շրջաններում: