«Ջին Քերոլն իմ ճաշակով չէ». Թրամփը՝ ի պատասխան սեռական ոտնձգություն կատարելու մեղադրանքների

Ի պատասխան 1990-ական թվականներին Նյու Յորքի խանութներից մեկում ամերիկյան Elle ամսագրի լրագրող Ջին Քերոլի հանդեպ սեռական ոտնձգություն կատարելու մեղադրանքների՝ ԱՄՆ նախագահ Դոնալդ Թրամփը հայտարարել է, որ նա իր «ճաշակով չէ», հաղորդում է The Guardian-ը:

«Ամենայն հարգանքով հայտարարում եմ, որ առաջինը՝ նա իմ ճաշակով չէ, և երկրորդ՝ նման բան երբեք տեղի չի ունեցել»,-ասել է ԱՄՆ նախագահը Սպիտակ տանը The Hill-ին տված հարցազրույցի ժամանակ:

Ավելի վաղ, Ջին Քերոլն իր գրքում պատմել էր, որ Դոնալդ Թրամփին հանդիպել է 1995 կամ 1996 թվականին՝ Նյու Յորքի Bergdorf Goodman հանրախանութում: Կնոջ պնդմամբ՝ ԱՄՆ նախագահն իրեն տարել է ներքնազգեստների բաժնի հանդերձարան և սեռական ոտնձգություն կատարել: Մինչ այդ Թրամփն իրեն դիմել է ինչ-որ կնոջ համար նվեր գնելու խորհուրդ ստանալու նպատակով:

Հերքելով մեղադրանքները՝ Թրամփը հայտարարել է, որ կինը «բացարձակապես ստում» է:

«Ես այդ կնոջ մասին ոչինչ չգիտեմ: Ես նրան չեմ ճանաչում: Սարսափելի է, որ մարդիկ կարող են նման հայտարարություններ տարածել»,- հայտնել է ԱՄՆ նախագահը: