Յակուբովիչն իր մեքենան վարել է մայթով (լուսանկարներ)

«Հրաշքների դաշտ» («Поле чудес») ծրագրի հաղորդավար Լեոնիդ Յակուբովիչը խախտել է ճանապարահտրանսպորտային երթևեկության կանոնները և Չեբոքսարիում դուրս է եկել մայթ, հաղորդում է РИА Новости-ն: Չուվաշիայի Հանրապետության ոստիկանական վարչությունը փաստի առթիվ ստուգում է անցկացրել:

Դեպքը տեղի է ունեցել հունիսի 1-ին: Յակուբովիչը ռուսական Առաջին ալիքի այլ հաղորդավարների հետ Երեխաների պաշտպանության տոնի առթիվ եկել էր Չեբոքսարի, որպեսզի մասնակցի բարեգործական ակցիայի: Հաղորդավարը որոշել է մեքենայով գնալ միջոցառման անցկացման վայր, սակայն նրա ճանապահը փակել է ավտոբուսը, որը հատուկ է այդտեղ կայանված եղել՝ փողոցով երթևեկությունը սահմանափակելու նպատակով:

Յակուբովիչն իր Lexus մեքենայով բարձրացել է մայթ և շրջանցել ավտոբուսը:

Միջադեպի լուսանկարները հրապարակվել են ВКонтакте սոցիալական ցանցում: