Բրիտանական «Թաքնված տաղանդ» հեռուստանախագծի մասնակիցը վարչապետ Թերեզա Մեյին նմանակելիս հանել է հագուստը

Բրիտանական «Թաքնված տաղանդ» (Got Talent) հեռուստանախագծի ժյուրիի անդամները բազմիցս հասցրել են ապշել, սակայն այսօրվա թողարկման ժամանակ նրանք իսկապես «քար էին կտրել»:

Ինչպես գրում է Daily Mail-ը, նրանց տպավորել է վարչապետ Թերեզա Մեյի նմանակումը վերջինիս հրաժարականի մասին հուզումնալից հայտարարությունից մեկ օր անց: Յոգայի 56-ամյա ուսուցիչ Քեթ Թոմփսոնը ներկայացել է վարչապետի կերպարով՝ նմանակելով ինչպես նրա հագուստը, սանրվածքը, այնպես էլ պարային շարժումները:

Նմանակողը ներկայացել է այնպիսի հագուստով, որը վարչապետ Մեյը կրել էր անցյալ տարվա օգոստոսին Հարավային Աֆրիկա կատարած այցելության ժամանակ: Թոմփսոնը նաև կրկնօրինակել է այն պարային շարժումները, որոնք վարչապետը ցուցադրել էր տեղի դպրոցներից մեկի աշակերտների հետ միասին պարելիս:

Իսկ ելույթի վերջնամասում պարելիս նա նույնիսկ հանել է հագուստը՝ մնալով ներքնազգեստով՝ թափահարելով Բրիտանիայի և ԵՄ դրոշները: Աղբյուրը նշում է, որ հանդիսականին նույնպես տպավորել է յոգայի ուսուցչի ելույթը, որին ողջունել են հոտնկայս ծափահարություններով: