Ռուսաստանում ադրբեջանցի գործարար Արազ Աղալարովի ընկերության դեմ 105 մլն ռուբլու հայց է ներկայացվել

ՌԴ Կալինինգրադի մարզի իշխանությունները 105 մլն ռուբլու հայց են ներկայացրել ռուսաստանաբնակ ադրբեջանցի գործարար Արազ Աղալարովի Crocus Group ընկերության դեմ:

Ինչպես նշում է rbc.ru-ն, հայցը կապված է 2018թ. Ֆուտբոլի աշխարհի առաջնության համար մարզադաշտի նախագծման ուշացման հետ: Հայցվորը պահանջում է վերադարձնել պայմանագրի ընդհանուր արժեքի 20%-ը:

Մոսկվայի մարզի արբիտրաժային դատարանն ընդունել է հայցը, որի վերաբերյալ առաջին նիստը կայանալու է ապրիլի 24-ին:

523,9 մլն ռուբլի արժողությամբ պայմանագիրը կնքվել է 2015թ. և վերաբերում է մարզադաշտի կառուցման համար նախագծային և աշխատանքային փաստաթղթերի մշակմանը:

Հայցվոր կողմի պնդմամբ՝ Crocus Group-ի թույլ տված ուշացումների հետևանքով իրենք 201 մլն ռուբլու վնաս են կրել:

Մինչդեռ ընկերությունում հայտնել են, որ աշխատանքների իրականացման տևողության ավելացումը տեղի է ունեցել ոչ իրենց մեղքով: Նրանք նշել են, որ ընթացքում իրենք սկզբնական նախագծում մի շարք փոփոխություններ անելու առաջադրանքներ են ստացել:

«Փոփոխություններ անելու առաջադրանքները ստացվել են աշխատանքների մեկնարկից երկար ժամանակ անց և նույնիսկ դրանց ավարտից (01.05.2016) հետո, ինչը միանշանակ չէր կարող չանդրադառնալ աշխատանքների կատարման տևողության վրա»,-ասվում է ընկերության հայտարարությունում: