Ունենք մոտ 512 սուբվենցիոն ծրագրեր՝ 22,6 մլրդ դրամի. Սա աննախադեպ ցուցանիշ է. Պապիկյան

Տարածքային կառավարման եւ զարգացման նախարարություն 190 ծրագիր է ներկայացվել, որոնցից 14-ն արդեն իրականացվել է, եւս 31 ծրագիր իրականացման փուլում է: Այս մասին այսօր՝ մարտի 20-ին, մամուլի ասուլիսի ժամանակ նշեց Տարածքային կառավարման եւ զարգացման նախարար Սուրեն Պապիկյանը:

Նրա խոսքով, մնացյալը դեռեւս հայտարարված մրցույթներ են, որոնցով մինչեւ տարվա կես արդեն կունենանք կոնկրետ արդյունքներ:

«2018-ին սուբենցիոն ծրարգերի համար տրամադրվել է ավելի քան մեկ մլրդ դրամ կառավարության կողմից, եւ այս ընթացքում իրականացվել եւ պատրաստվում է իրականացնել ասֆալտապատման ոլորտում 51 ծրագիր, խմելու ջրի ոլորտում՝ 11, կոյուղի՝ 3, ոռոգում՝ 7, փողոցային լուսավորություն՝ 24 բնակավայրերում, տեխնիկայի ձեռքբերում՝ 8,համայնքային շինությունների շինարարություն՝ 14, մանկապարտեզ, դպրոց՝ 15, այգիներ, պուրակներ, բակեր՝ 16 եւ մեկ աղբավայրի բարեկարգում:

Ինչ վերաբերում է այս տարվան, ապա մարտին ամփոփել ենք այս տարվա սուբվենցիոն ծրագրերի ցանկը եւ ունենք մոտ 512 սուբվենցիոն ծրագրեր՝ 22,6 մլրդ դրամի: Իհարկե, հնարավոր է այս ծրագրերի մի մասը հանձնաժողովը չընդունի, դա սովորաբար մի փոքր մասն է կազմում: Սա աննախադեպ ցուցանիշ է, որն ուղղված է համայնքներին ինքնուրույն դարձնելու եւ նաեւ ապակենտրոն կառավարման նպատակ ունի»,-ընդգծեց Պապիկյանը:

Նա նաեւ հավելեց, որ ջրամատակարարման համակարգերում փոփոխություն տեղի կունենա մոտ 110 բնակավայրերում: