Ինչպես է քնելու դիրքն ազդում առավոտյան տրամադրության վրա. բլոգերը սեփական հետազոտությունն է անցկացրել

Շատերի կարծիքով՝ քունն առնելու համար անհրաժեշտ է անպայման 8 ժամ քնել, սակայն մասնագետները կարծում են, որ կարևոր է հետևել ոչ թե քնի ժամաքանակին, այլ որակին, որն ապահովում է քնելու դիրքը: Այս մասին գրում է Woman.ru-ն՝ հղում անելով սեփական հետազոտությունն իրականացրած բլոգերին:

Հետազոտությանը հազարից ավելի մարդ է մասնակցել: Նրանք բոլորը պատմել են, թե երբ և ինչքան են քնում, ինչպես են քնում և թե ինչ են զգում արթնանալուց հետո:

Պարզվում է, որ առավել արդյունավետ և ուժերի վերականգնմանը նպաստող քուն ստանում են այն մարդիկ, որոնք սովոր են քնել մեջքի վրա պառկած: Նրանցից շատերը հայտնել են, որ շատ հեշտ են արթնանում և իրենց լավ են զգում ողջ օրվա ընթացքում:

Թեև նշվում է, որ մեջքի վրա քնել նախընտրողները քիչ են: Ճնշող մեծամասնությունը սիրում է քնել կողքի կամ փորի վրա շուռ եկած: