Կրիշտիանու Ռոնալդուն մտադիր է Մադրիդում մազերի փոխպատվաստման կենտրոն հիմնել

Պորտուգալացի հայտնի ֆուտբոլիստ Կրիշտիանու Ռոնալդուն մտադիր է Իսպանիայի մայրաքաղաք Մադրիդում մազերի փոխպատվաստման կենտրոն հիմնել, որի կառավարման գործում կենտրոնական դեր կունենա նրա քաղաքացիական կինը՝ Ջորջինա Ռոդրիգեսը: Այս մասին հաղորդում է sportbible.com-ը:

Ֆուտբոլիստը Insparya Group ընկերության համահիմնադիրներից է, որը մի շարք կենտրոններ ունի ամբողջ Պորտուգալիայում, սակայն Մադրիդում նման կենտրոն հիմնելու գաղափարը նոր է:

Ռոնալդուն բիզնեսի մեջ արդեն 1 մլն եվրո է ներդրել և մտադիր է առաջիկա տարիներին այդ ներդրումը 25 միլիոնի հասցնել:

Երեսունչորսամյա ֆուտբոլիստն ինստագրամյան իր էջում լուսանկար է հրապարակել Ջորջինա Ռոդրիգեսի հետ, որում զույգը քնարկում է նախաձեռնության մանրամասները:

Նոր կենտրոնը 150 աշխատակից կունենա: Նախատեսվում է, որ այնտեղ օրական 18 փոխպատվաստում կիրականացվի, ընդ որում՝ փոխպատվաստումների գինը կսկսվի 4000 եվրոյից:

«Ես ցանկանում էի, որ միջազգային մակարդակի առաջին կլինիկան բացվի Մադրիդում, որտեղ ապրել եմ երկար տարիներ»,- ասել է ֆուտբոլիստը:

Կենտրոնը կունենա օտարերկրյա հաճախորդների համար նախատեսված հատուկ փաթեթներ, որոնք կներառեն հյուրանոցի, ինքնաթիռի և տեղափոխման ծախսերը: