Քիմ Քարդաշյանի քույրն անկեղծացել է իր արտաքինի փոփոխության մասին՝ ամսագրի շապիկին ներկայանալով նոր կերպարով (լուսանկարներ)

Քիմ Քարդաշյանի կրտսեր քրոջը՝ Քայլի Ջեններին, հաճախ մեղադրում են պլաստիկ վիրահատություններ անելու մեջ, սակայն նա պնդում է, որ իր արտաքին տեսքի փոփոխությունները «լավ վարսերի խնամքի և դիմահարդարման, ինչպես նաև ֆիլերների» արդյունք են:

Ինչպես գրում է Daily Mail-ը, 21-ամյա գեղեցկուհին իր կատարյալ կամարաձև հոնքերը և կոկիկ հարդարված դեմքը ցուցադրել է Paper ամսագրի 2019-ի «Փոփոխություն» համարի շապիկին:

Ամսագրում նա բացահայտում է իր փոփոխությունը՝ ռեալիթի շոուի՝ թարմ տեսք ունեցող դեռահաս աղջկանից մինչև դիմահարդարման վարպետի:

«Մարդիկ մտածում են, որ ես պլաստիկ վիրահատությունների եմ ենթարկվել և ամբողջությամբ փոխել դեմքիս կառուցվածքը, ինչը բոլորովին ճիշտ չէ: Ես սարսափում եմ և երբեք դա չէի անի: Նրանք չեն պատկերացնում, թե ինչ կարող են անել լավ վարսերն ու դիմահարդարումը, ինչպես և ֆիլերները», - ասել է Քայլին:

Քայլին 10 տարեկան էր, երբ կայացավ Keeping Up with the Kardashians ռեալիթի շոուի պրեմիերան: Այդ օրվանից մարդիկ հետևում էին նրա աճին և օրեցօր նկատվող փոփոխություններին, ինչին զուգահեռ ավելի էին շատանում պլաստիկ վիրահատությունների մասին խոսակցությունները: