Կիևում կայացել է Անի Լորակի ու նրա թուրք ամուսնու ամուսնալուծության գործով առաջին դատական նիստը

Ուկրաինայի մայրաքաղաք Կիևում մեկնարկել է ուկրաինացի հայտնի երգչուհի Անի Լորակի և նրա ամուսնու՝ ազգությամբ թուրք գործարար Մուրադ Նալչաջօղլուի միջև ամուսնալուծության գործով դատական գործընթացը, այս մասին գրում է korrespondent.net-ը:

Կողմերի փաստաբանները զերծ են մնացել գործի վերաբերյալ մանրամասն մեկնաբանություններից՝ հաշվի առնելով Լորակի ու Նալչաջօղլուի պահանջը: Այսօր կայացած առաջին դատական նիստն անցել է դռնփակ ձևաչափով: Չի բացառվում, որ գործընթացը կձգվի մի քանի տարի, քանի որ կողմերն ունեն տարբեր քաղաքացիություններ:

Դեռևս այս տարվա հուլիսին լրատվամիջոցներում տարածվեց տեղեկություն, ըստ որի՝ Անի Լորակն ամուսնալուծվում է թուրք գործարարից՝ վերջինիս դավաճանության պատճառով:

Ուկրաինացի երգչուհին, որին հաճախ քննադատում են պարբերաբար Ռուսաստանում ելույթներ ունենալու համար, թուրք ամուսնու հետ համատեղ կյանքով ապրեց 9 տարի: Զույգն ունի Սոֆիա անունով 7 տարեկան աղջիկ, որը, ըստ լրատվամիջոցների, հաճախում է Մոսկվայի բարձրակարգ դպրոցներից մեկը: