Հոլիվուդի «վետերան» Քըրք Դուգլասը նշել է ծննդյան 102-րդ տարեդարձը (լուսանկարներ)

Հոլիվուդի ամենաերկարակյաց աստղերից մեկը՝ «Սպարտակ»-ի դերակատար Քըրք Դուգլասը, նշել է ծննդյան 102-րդ տարեդարձը:

Ինչպես նշում է Daily Mail-ը, դերասանը կնոջ՝ 99-ամյա Էնի Բայդենսի հետ դուրս է եկել Բևեռլի Հիլզի շքեղ առանձնատան բակ, որտեղ հավաքվել են մեծ թվով երկրպագուներ:

Հոլիվուդի «վետերանին» շնորհավորողների շարքում են եղել նաև որդին՝ դերասան Մայքլ Դուգլասը, ու հարսը՝ դերասանուհի Քեթին Զետա Ջոնսը: Վերջինսը սկեսրայրին անվանել է «աշխարհի ամենագեղեցիկ տղամարդ»:

«Շնորհավորում ենք աշխարհի ամենագեղեցիկ տղամարդու 102-րդ տարեդարձը: Մենք քեզ սիրում ենք, Քըրք»,-ասել է Զետա Ջոնսը:

Հիշեցնենք, որ տարեսկզբին Քեթրին Զետա Ջոնսը հատուկ մրցանակ է շնորհել սկեսրայրին կինոարվեստում ունեցած երկար կարիերայի ու ձեռքբերումների համար:

Հայտնի է, որ Քըրք Դուգլասը նկարահանվել է ավելի քան 90 ֆիլմում, իսկ 1950-60-ական թվականներին համարվել է հոլիվուդյան գերաստղերից: Նրա ամենահայտնի դերերից մեկը Սպարտակն է: