Օռնելա Մուտին ցանկանում է Ռուսաստանի քաղաքացիություն ստանալ

Իտալացի դերասանուհի Օռնելա Մուտին լրագրողներին պատմել է իր ռուսական արմատների մասին և խոստովանել, որ ցանկանում է Ռուսաստանի քաղաքացիություն ստանալ:

Այս մասին տեղեկացնում է РИА Новости-ն՝ հիշեցնելով, որ իտալուհին մարմնավորում է կայսրուհի Աննա Իոաննովնայի դերը «Բյուրեղյա պալատ» ներկայացման մեջ, որի պրեմիերան Կրեմլի պալատում կայանալու է սեպտեմբերի 10-ին:

Ավելի վաղ որոշ լրատվամիջոցներ գրում էին, որ Մուտին դիմում է ներկայացնելու ռուսական քաղաքացիություն ստանալու համար, սակայն դա դեռևս տեղի չի ունեցել:

«Ես Ռուսաստանի բնակիչ եմ, գրանցված եմ Մոսկվայում: Ես քաղաքացիություն չունեմ, սակայն այստեղ գալիս եմ հնարավորինս հաճախ: Կցանկանայի ռուսական քաղաքացիություն ունենալ», - ասել է Մուտին՝ պատասխանելով լրագրողների հարցին, թե արդյոք ցանկանում է ՌԴ քաղաքացիություն ունենալ:

 Դերասանուհու խոսքով՝ իր տատն ու պապը ծնունդով Սանկտ Պետերբուրգից են, այդ իսկ պատճառով նա երկար ժամանակ ցանկացել է ավելի շատ բան իմանալ ռուսական ավանդույթների մասին: