Diddly Squat ֆերմայից գողացել են 11 հազվագյուտ ոչխար

Բրիտանացի հեռուստահաղորդավար Ջերեմի Քլարկսոնի հայտնի Diddly Squat ֆերմայից գողացել են 11 հազվագյուտ ոչխար։ Կենդանիների անհետացումը նա հայտնաբերել է հոտի հերթական հաշվարկի ժամանակ՝ գործընկեր Քալեբ Կուպերի հետ։ Գողացված Easycare ցեղատեսակի ոչխարների ընդհանուր արժեքը գնահատվում է շուրջ 2000 ֆունտ։

Քլարկսոնը դեպքը որակել է որպես հատկապես ցավալի՝ ընդգծելով, որ կենդանիների կորուստն իր համար ավելի ծանր է, քան նյութական գույքի կորուստը։ Նա նաև շնորհակալություն է հայտնել տեղի ոստիկանությանը՝ դեպքին լրջորեն վերաբերվելու համար։

Հաղորդավարի խոսքով՝ գողերը, ամենայն հավանականությամբ, օգտվել են այն պահից, երբ ֆերմայում նկարահանումներ չեն եղել, իսկ տարածքում չեն գործել նաև տեսախցիկներով դրոններ։

Easycare ոչխարները հեշտությամբ ճանաչելի են, քանի որ այս ցեղատեսակը խուզելու կարիք չունի, և, ըստ Քլարկսոնի, շրջակայքում նման կենդանիներ գրեթե ոչ ոք չի պահում։ Դեպքի առնչությամբ ոստիկանությունը հետաքննություն է իրականացնում։

radar armenia