Telegram-ը մտադիր է սեփական կրիպտոարժույթը ստեղծել

«Վկոնտակտե»-ի նախկին ղեկավար Պավել Դուրովի ստեղծած Telegram մեսենջերը մտադիր է ստեղծել սեփական բլոկչեյն պլատֆորմը եւ կրիպտոարժույթը: Այս մասին գրում է The TechCrunch պորտալը՝ վկայակոչելով սեփական աղբյուրներին: Պլատֆորմը կստանա Telegram Open Network (TON) անվանումը, իսկ կրիպտոարժույթը կկոչվի Gram, հաղորդում է ՌԲԿ-ն:

TechCrunch-ի հաղորդմամբ՝ սեփական կրիպտոարժույթի թողարկման համար ընկերությունը կանցկացնի ICO (Initial Coin Offering):

Telegram-ը մտադիր է տոկենների նախնական վաճառքով 500 մլն դոլար ներգրավել, այսինքն ամբողջ ICO-ի շրջանակներում ընկերությունը կարող է 3 մլրդ-ից մինչեւ 5 մլրդ ներգրավել, հաղորդում է TechCrunch-ը՝ նշելով, որ թվերը կարող են փոխվել:

Պարբերականը նշում է նաեւ, որ ICO-ն կարող է կրիպտոարժույթի ամենախոշոր վաճառքը դառնալ, ավելի շատ քան Tezos-ը, որը 2017-ի հուլիսին 230 մլն է ներգրավել: