ԱՄՆ Խաղաղության կորպուսի կամավորները կապրեն ու անգլերեն կդասավանդեն Հայաստանի մարզերում

Հայ աշակերտներին ու երիտասարդներին անգլերեն սովորեցնելու և նոր հմտությունների ձեռք բերման հարցում նրանց օգնելու համար ԱՄՆ-ից 30 կամավոր է ժամանել Հայաստան։ Նրանք այստեղ կանցկացնեն 2 տարի, կապրեն ու անգլերեն կդասավանդեն Հայաստանի մարզերում։

Երևանում ԱՄՆ Խաղաղության կորպուսի 31-րդ կամավորների խմբի երդման արարողությանը ԱՄՆ գործերի ժամանակավոր հավատարմատար Դեյվիդ Ալենը նշել է, որ կամավորներն այս տարի առաջին անգամ կտեղակայվեն նաև Սյունիքում։ Նրա խոսքով՝ 2025-ի օգոստոսին Վաշինգտոնում ձեռք բերված համաձայնություններից հետո հայ-ամերիկյան գործակցությունն ավելի է ամրապնդվել։ 

Այս տարի ևս ամերիկացի 30 կամավոր Հայաստանում կօգնի դպրոցականներին ու երիտասարդներին՝ անգլերենի հմտությունները զարգացնելու և նոր հմտություններ ձեռք բերելու գործում։ ԱՄՆ-ից Հայաստան ժամանած կամավորները երկու տարի ինտենսիվ անգլերենի դասընթացներ կվարեն Հայաստանի մարզերում։ Այս տարվա խումբը մեծ է՝ կազմված 30 կամավորներից։ ՀՀ-ում ԱՄՆ գործերի ժամանակավոր հավատարմատար Դեյվիդ Ալենը շեշտում է, որ այս տարի կամավորները կենտրոնացած կլինեն Սյունիքում։

«Հայաստըանում կամավորներ կան ամեն տեղ, սակայն 2020 թվականից մենք Սյունիքում կամավորներ չունեինք և այս շրջափուլի կամավորներն աշխատելու են նաև Սյունիքի մարզում։ Սա ցույց է տալիս այն վստահությունը, որ մենք ունենք խաղաղության գործընթացի նկատմամբ, որը հաջորդել է 2025թ օգոստոսի 8-ին վաշինգտոնյան պայմանավորվածություններին»։

Արդյո՞ք նաև Սյունիքում ամերիկացի կամավորների տեղակայումը կապ ունի TRIPP նախագծի հետ։ Դեյվիդ Ալեն. «Ուղիղ կապ TRIPP-ի հետ կամավորների տեղակայումը չունի, սակայն օգոստոսի 8-ի վաշինգտոնյան պայմանավորվածություններից հետո, շրջանակային համաձայնագրի ձևավորումից հետո նպաստավոր պայմաններ եղան, որպեսզի մենք վստահաբար կարողանանք Սյունիքի մարզում տեղակայել մեր կամավորներին»։

Ժամանակավոր հավատարմատարի խոսքով՝ նախորդ շաբաթ TRIPP-ին առնչվող  համաձայնագրեր են բանակցվել։ Մանրամասները դեռ հրապարակման ենթակա չեն, սակայն առաջընթացը շարունակվում է։

Խաղաղության կորպուսի հայաստանյան գրասենյակի տնօերն Ուիլյամ Օրոարքը մանրամասնում է, թե ինչով են զբաղվելու ամերիկացի կամավորները։

«Հայաստանում Խաղաղության կորպուսn աշխատում է անգլերենը որպես երկրորդ լեզու դասավանդելու և երիտասարդների ներուժը խթանող ծրագրերի ուղղությամբ։ Խոսքը առաջնորդության հմտությունների ուսուցման մասին է, որոնք կօգնեն երիտասարդներին հաջողելու բիզնեսում և հասարակական կյանքում»։

Ամերիկացի կամավորները արդեն 11 շաբաթ Հայաստանում են։ Այդ ընթացքը նրանք անցկացրել են տարբեր մարզերում հայկական ընտանիքներում ապրելով, հայերեն սովորելով, հայկական մշակույթին ծանոթանալով։

«Առաջին անգամ եմ Հայաստանում և շատ սիրուն է Հայաստանը։ Ապրում եմ Իջևանում»։

«Ես անգլերենի ուսուցիչ եմ լինելու երկու տարի։ Իմ անունը Բլեք է։ Ուսում էի ծառայել և խաղաղության կորպուսը ինձ Հայաստան ուղարկեց։ Երկու ամիս առաջ Հայաստան եկա։ Նորնուզում են ապրում և շատ մեծ ընտանիք ունեմ և նրանց կկարոտեմ։ Հայ մարդիք շատ բարի են»։

Խաղաղության կորպուսի հայաստանյան գրասենյակը գործում է 1992 թվականից։ 24 տարվա ընթացքում ավելի քան 1200 կամավոր է ժամանել Հայաստան անգլերեն ուսուցանելու հայ երիտասարդներին։