ՄԻՊ-ն այցելել է զորամաս․ քննարկվել են զինծառայողների իրավունքների պաշտպանությանն առնչվող հարցեր

Մայիսի 19-ին Տավուշի մարզ իրականացրած այցի շրջանակներում Մարդու իրավունքների պաշտպան Անահիտ Մանասյանը` ՄԻՊ աշխատակազմի ներկայացուցիչների ուղեկցությամբ այցելել է Պաշտպանության նախարարության N զորամաս։

Այցի ընթացքում Պաշտպանը հանդիպում է ունեցել զորամասի հրամանատարական և սպայական կազմի ներկայացուցիչների հետ։ Քննարկվել են զինծառայողների և նրանց ընտանիքների իրավունքների ապահովմանն ու պաշտպանությանն առնչվող մի շարք հարցեր, այդ թվում՝ սոցիալական երաշխիքների ապահովումը, զինվորական ծառայության պայմանների բարելավումը, ատեստավորման գործընթացը, բնակարանային ապահովության խնդիրները, ինչպես նաև զինծառայողների ծառայության և կեցության պայմաններին վերաբերող այլ հարցեր։

Անահիտ Մանասյանը շրջայց է կատարել զորամասում և ուսումնասիրել զինծառայողների սոցիալ-կենցաղային պայմանները։ Ուշադրության կենտրոնում են եղել բուժծառայության կազմակերպումը, սննդի որակը, զինծառայողների կեցության և ծառայության պայմանները, ինչպես նաև կարգապահության և բարոյահոգեբանական վիճակին առնչվող հարցերը։

Զինծառայողների իրավունքների հետ կապված հարցերը մշտապես գտնվում են Մարդու իրավունքների պաշտպան Անահիտ Մանասյանի ուշադրության ներքո, դրանք բարձրաձայնվում և հասցեավորվում են տարբեր ձևաչափերով:

Անահիտ Մանասյանը բարձր է գնահատում Պաշտպանության նախարարության հետ ձևավորված արդյունավետ համագործակցությունը, որի շրջանակում լուծվում են զինծառայողների կողմից բարձրացված` մարդու իրավունքներին վերաբերող մի շարք հարցեր։