ԱՄՆ-ն Իրանին է փոխանցել 15 կետից բաղկացած ծրագիր

ԱՄՆ-ն միջնորդների (մասնավորապես՝ Պակիստանի) միջոցով Իրանին է փոխանցել 15 կետից բաղկացած խաղաղության ծրագիր, հաղորդել է The New York Times-ը՝ հղում անելով երկու տեղեկացված պաշտոնյաների: Իսրայելական N12 հեռուստաալիքի տվյալներով՝ ծրագիրը անդրադառնում է անվտանգության հիմնական հարցերին՝

• Իրանի երեք հիմնական միջուկային օբյեկտների (Նաթանզ, Սպահան, Ֆորդո) ապամոնտաժում և ուրանի հարստացման լիակատար դադարեցում:
• Բալիստիկ հրթիռների ծրագրի կասեցում կամ դրա խիստ սահմանափակում (թե՛ հեռահարության, թե՛ քանակի առումով):
• Հորմուզի նեղուցի լիակատար վերաբացում և ազատ նավարկության ապահովում:

Փոխարենը Վաշինգտոնն առաջարկում է չեղարկել միջուկային ոլորտի պատժամիջոցները և աջակցել (խիստ վերահսկողության ներքո) Իրանի քաղաքացիական միջուկային ծրագրին, մասնավորապես՝ Բուշերի ատոմակայանի զարգացմանը:

Թեհրանի պաշտոնական պատասխանը դեռևս անհայտ է: Նաև պարզ չէ, թե ինչպես է Իսրայելը վերաբերվում խաղաղության ծրագրին, քանի որ չորս շաբաթ շարունակ միացել է ԱՄՆ-ին՝ Իրանի դեմ հարվածներ հասցնելու հարցում:

Axios-ը, հղում անելով աղբյուրներին, հաղորդում է, որ Իրանը կարծում է, որ ԱՄՆ-ի բանակցային առաջարկը կարող է ծուղակ լինել, իրանցի պաշտոնյաները «չեն ուզում կրկին խաբվել», քանի որ անցյալ տարվա հունիսին և այս տարվա փետրվարի 28-ին Իրանի վրա հարձակումները տեղի են ունեցել բանակցային գործընթացի ամենաթեժ պահին։

Մարտի 23-ին ԱՄՆ նախագահ Դոնալդ Թրամփը հայտարարել էր, որ ԱՄՆ-ն և Իրանը շատ դրական և արդյունավետ բանակցություններ են վարել։ Նա նշել էր, որ Պենտագոնին հանձնարարել է հինգ օրով հետաձգել Իրանի էներգետիկ ենթակառուցվածքների վրա հարվածները։ Իրանի խորհրդարանի խոսնակ Մոհամմադ Բաղեր Ղալիբաֆը հայտարարել էր, որ ԱՄՆ-ի հետ բանակցություններ չեն եղել, և որ կեղծ լուրերը ծառայում են շուկաները մանիպուլյացիայի ենթարկելուն։

Միևնույն ժամանակ, մարտի 24-ին Իրանի արտաքին գործերի նախարարությունը տեղեկացրել էր ՄԱԿ-ի Անվտանգության խորհրդին և Ծովագնացության միջազգային կազմակերպությանը, որ «ոչ թշնամական նավերը» կարող են անցնել Հորմուզի նեղուցով, եթե նախապես համակարգեն իրենց գործողությունները Թեհրանի հետ։

«Ոչ թշնամական նավերը, այդ թվում՝ այլ պետություններին պատկանող կամ նրանց հետ կապված նավերը, կարող են անցնել՝ պայմանով, որ չմասնակցեն կամ չաջակցեն Իրանի դեմ ագրեսիայի գործողություններին և լիովին պահպանեն հայտարարված անվտանգության կանոնները», — նշվում է փաստաթղթում, որին հղում է արել Reuters-ը։