Միացյալ Թագավորությունում աճում է հակասեմականությունը

Միացյալ Թագավորության արդարադատության նախարար Շաբանա Մահմուդը խիստ դատապարտել է երկրում հակասեմականության «տագնապալի աճը» այն բանից հետո, երբ Լոնդոնում հրկիզող ռումբով (firebomb) թիրախավորվել է հրեական կամավորական շտապօգնության ծառայության մեքենան։

Միջադեպը տեղի է ունեցել Լոնդոնի հյուսիսային հատվածում գտնվող Սթեմֆորդ Հիլլ թաղամասում, որտեղ բնակվում է մեծաթիվ հրեական համայնք։ «Հատսոլա» (Hatzola) բարեգործական կազմակերպության շտապօգնության մեքենայի վրա նետված պայթուցիկի հետևանքով բռնկված հրդեհը զգալի վնաս է հասցրել տրանսպորտային միջոցին, սակայն, բարեբախտաբար, մարդկային զոհեր չեն եղել։

«Սա պարզապես հարձակում չէ գույքի վրա, սա հարձակում է մեր հասարակության հիմքերի և այն մարդկանց դեմ, ովքեր կյանքեր են փրկում։ Հակասեմականությունն ու ատելությունը տեղ չունեն մեր փողոցներում»,- իր ելույթում նել է երկրի արդարադատության նախարարը։

Ոստիկանությունը դեպքը հետաքննում է որպես ատելության հողի վրա կատարված հանցագործություն։ Համայնքային անվտանգության մարմինները հայտնում են, որ վերջին ամիսներին Բրիտանիայում հրեական հաստատությունների և անհատների դեմ ուղղված միջադեպերի թիվը հասել է աննախադեպ մակարդակի։