Մերձավոր Արևելքում լարվածությունը պահպանվում է

Թեհրանը, Շիրազը և իրանական այլ տարածքներ կրկին ենթարկվել են հրթիռակոծության: Տեղեկություններ կան, որ իրանական կողմն էլ հարվածել է Թել Ավիվին, մասնավորապես՝ Բեն Գուրիոն օդանավակայանին: Թեհրանից նախազգուշացրել են, որ Իրանի ազգային անվտանգության խորհրդի քարտուղար Ալի Լարիջանիի սպանությունն անպատասխան չի մնա: Հայտարարությունը տարածվել է Գերագույն առաջնորդ Մոջթաբա Խամենեի տելեգրամյան ալիքում:

Իսլամական Հանրապետությունը նաև թիրախավորել է Կատարում և Սաուդյան Արաբիայում էներգետիկ ենթակառուցվածքներ՝ նշելով, որ դա պատասխանն է Հարավային Պարս գազի հանքավայրին Իսրայելի հարվածներին։ Ռաս Լաֆան արդյունաբերական քաղաքի թիրախավորման ֆոնին, որը Կատարի գլխավոր գազային հանգույցն է, երկրի ԱԳՆ-ն պահանջել է, որ իրանցի դիվանագետները լքեն երկիրը։

ԱՄՆ նախագահը հայտարարել է՝ Իսրայելի կողմից Հարավային Պարսի թիրախավորումը չի համաձայնեցվել Վաշինգտոնի հետ, սակայն Իսրայելն այլևս չի հարձակվի իրանական հանքավայրերի վրա: «Իրանն էլ պետք է դադարեցնի Կատարին հարվածները, հակառակ դեպքում արդեն ԱՄՆ-ը կպայթեցնի Հարավային Պարսը»,- Իքսի էջում գրել է Դոնալդ Թրամփը։

ԱՄՆ նախագահը նաև հայտարարել է, որ Թեհրանը ցանկանում է բանակցել, սակայն ինքը դեմ է դրան, քանի որ պայմանները բավականաչափ լավը չեն: Հարկ է նշել, որ Իրանը պաշտոնական մակարդակով դեռևս բացառում է բանակցությունների վերականգնման հեռանկարը: