Ժաննա Անդրեասյանը Լոռու մարզում ծանոթացել է 300 դպրոց ծրագրով իրականացվող աշխատանքներին և վերակառուցվող մարզական ենթակառուցվածքներին

ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր աշխատանքային այցով գտնվում էր Լոռու մարզում։ Նախարարը Վանաձորում և մարզի մի շարք այլ համայնքներում ծանոթացել է կրթական, մարզական և պատմամամշակութային հաստատություններում իրականացվող կառուցման, վերանորոգման և վերականգնման աշխատանքներին:

Ժաննա Անդրեասյանի առաջին կանգառը Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցում էր։ Դպրոցի շենքը վերանորոգվել է Հայաստանի տարածքային զարգացման հիմնադրամի պատվիրատվությամբ` Կառավարության մինչև 2026 թվականը կառուցվող, հիմնանորոգվող կամ վերակառուցվող 300 դպրոցների ծրագրի շրջանակում: Վերանորոգման աշխատանքներն իրականացվել են 2025 թվականին։ Նախարարը շրջել է դպրոցի վերանորոգված մասնաշենքերում, ծանոթացել դասասենյակների, լաբորատորիաների և ընդհանուր օգտագործման տարածքների բարեկարգմանը, ինչպես նաև քննարկել կրթական միջավայրի արդիականացման և ուսումնական գործընթացի կազմակերպման հետ կապված հարցեր։ Դպրոցում նախատեսված է նաև ուսուցիչների կամավոր ատեստավորման քննասենյակ: Ժաննա Անդրեասյանը հետաքրքրվել է մանկավարժների մասնագիտական զարգացման և դպրոցի կադրերի համալրման խնդրով:

Աշխատանքների ընդհանուր արժեքը 388,081.2 հազար դրամ է։ 2025/2026 ուսումնական տարվա տվյալներով դպրոցում սովորում է 456 աշակերտ։

Հաջորդաբար նախարարն այցելել է Վանաձորի Ծովակալ Իսակովի անվան թիվ 23 հիմնական դպրոց, որտեղ 300 դպրոց ծրագրի շրջանակում ներկայում իրականացվում են վերանորոգման ակտիվ աշխատանքներ, ուսումնական նոր գույքը ևս դպրոցն արդեն ստացել է: Նախարարը ծանոթացել է իրականացվող շինարարական աշխատանքների ընթացքին, որոնք մեկնարկել են 2025 թվականին և այժմ գտնվում են ավարտական փուլում։ Աշխատանքների ընդհանուր պայմանագրային արժեքը կազմում է 221,938.1 հազար դրամ։ 2025/2026 ուսումնական տարվա տվյալներով դպրոցում սովորում է 586 աշակերտ։ Նախարարը ծանոթացել է նաև նոր կառուցված մարզադահլիճի մասնաշենքին՝ դիտարկելով մարզական ենթակառուցվածքների հնարավորությունները: Վերջինիս կառուցման աշխատանքները մեկնարկել են 2022 թ. և ավարտվել 2024 թ.։ Ծրագրի ընդհանուր արժեքը կազմել է 247,048.4 հազար դրամ։

Վանաձորի Սոս Նալղռանյանի անվան թիվ 13 ավագ դպրոցում նախարարը հետևել է շենքի վերակառուցման ընթացքին, ծանոթացել շինարարական աշխատանքների փուլերին և իրականացվող տեխնիկական լուծումներին։ Քննարկվել են նաև դպրոցական ենթակառուցվածքների արդիականացման, ժամանակակից կրթական միջավայրի ձևավորման, լաբորատորիաների և ուսումնաօժանդակ տարածքների կահավորման հարցերը։ Վերակառուցման աշխատանքները մեկնարկել են 2023 թվականին և նախատեսվում է ավարտել մինչև 2026 թվականի հունիսը։ Աշխատանքների ընդհանուր արժեքը կազմում է 1,980,471.0 հազար դրամ. դպրոցը նորոգվում է 300 դպրոց ծիագրով։ Ս. Նալղռանյանի անվան թիվ 13 ավագ դպրոցում ևս ուսուցիչների կամավոր ատեստավորման քննական կենտրոն է տեղակայվելու:

Հաջորդիվ Ժաննա Անդրեասյանն այցելել է Վանաձորի Կ. Ղարաքեշիշյանի անվան թիվ 1 արհեստագործական պետական ուսումնարան, ծանոթացել է շենքի հիմնանորոգման ընթացքին, լսարանների, արհեստանոցների և գործնական ուսուցման համար նախատեսված տարածքների վերանորոգման աշխատանքներին։ Ուսումնարանը պետական միջոցներով վերանորոգվել է, հագեցվել է լաբորատոր սարքավորումներով և անհրաժեշտ գույքով: Ուսումնարանը 50 աշխատակից ունի, որոնցից 42-ը՝ մանկավարժական աշխատող։ Նշվել է՝ սովորողների կողմից ամենամեծ պահանջարկը վայելում են «Խոհարարական գործ», «Վարսավիրական գործ» և «Ավտոփականագործ» մասնագիտությունները: Ուսումնարանում, ընդհանուր առմամբ, 9 մասնագիտություն է դասավանդվում: Կարևորվել է մասնագետների վերապատրաստումների իրականացումը:

Ուսումնարանի հիմնանորոգման աշխատանքները մեկնարկել են 2024 թվականին և այժմ գտնվում են ավարտական փուլում։ Ծրագրի ընդհանուր արժեքը կազմում է 564,689.5 հազար դրամ։

Նախարարի հաջորդ կանգառը Վանաձորի քաղաքային մարզադաշտն էր։ Այստեղ նա ծանոթացել է մարզադաշտի վերակառուցման նախագծին, քննարկել նախագծային լուծումները, ինչպես նաև մարզական ենթակառուցվածքների զարգացման հետ կապված ծրագրերը։ Վերակառուցման արդյունքում նախատեսվում է ստեղծել ՈՒԵՖԱ-ի 4-րդ կատեգորիայի՝ շուրջ 10 հազար նստատեղ ունեցող մարզադաշտ՝ ֆուտբոլի աշխարհի 2029 թվականի երիտասարդական առաջնության անցկացման նպատակով։ Նախագծային փաստաթղթերի մշակման պայմանագիրը կնքվել է միջազգային փորձ ունեցող «ՎենյուԷրա Հոլդինգ» ՍՊԸ-ի հետ՝ 593,040 եվրո ընդհանուր արժեքով։

Ժաննա Անդրեասյանն այցելել է նաև Վանաձորի Ստեփան Սարգսյանի անվան համալիր մարզադպրոց, որտեղ տեղում ծանոթացել է շենքի ներկայիս վիճակին, առկա ենթակառուցվածքներին և մարզական գործընթացի կազմակերպման պայմաններին։ Նախարարը շրջել է մարզադահլիճներում, դիտարկել մարզումների անցկացման պայմանները և զրուցել մարզիչների հետ։ Ներկայում մարզադպրոցում շուրջ 200 պատանի մարզվում է ձյուդո, սամբո և բռնցքամարտ մարզաձևերով։ Նախատեսված է նաև տրիբունա՝ 400 հանդիսականի համար:

Ժաննա Անդրեասյանը շնորհակալություն է հայտնել մարզադպրոցի մարզիչներին և աշխատակիցներին՝ տարիներ շարունակ սեփական ջանքերով և նվիրվածությամբ մարզումները շարունակելու համար։ Նա նշել է, որ մարզահամալիրն անցնում է պետության ենթակայության ներքո, ինչի շնորհիվ հնարավոր կլինի առկա խնդիրներին համակարգված լուծումներ տալ և ապահովել մարզադպրոցի լիարժեք գործունեությունը։ Այցի ընթացքում քննարկվել են նաև կառույցի հետագա զարգացման, հնարավոր վերականգնման և արդիականացման ծրագրերը, ինչպես նաև մարզական ենթակառուցվածքների բարելավման և սաների թվի ավելացման հնարավորությունները։

Մարզակառույցը պատկանում է «Հայաստան» մարզական հասարակական կազմակերպությանը, որն ունի ավելի քան 1.2 մլրդ դրամի հարկային պարտավորություն։ ՀՀ կառավարության 2026 թվականի մարտի 5-ի N 252-Ն որոշմամբ հատկացվել է 311,905.4 հազար դրամ գումար` գույքը հարկադիր աճուրդից ձեռք բերելու և գործընթացի հետ կապված պարտադիր վճարներն իրականացնելու նպատակով։

Այնուհետև ԿԳՄՍ նախարար Ժաննա Անդրեասյանն այցելել է Գյուլագարակի միջնակարգ դպրոց, որը շահագործման է հանձնվել նախորդ տարվա դեկտեմբերին` Կառավարության 300 դպրոց ծրագրով։

Նախարարը շրջել է դպրոցում, ծանոթացել իրականացված վերանորոգման աշխատանքներին և ստեղծված պայմաններին, զրուցել ուսուցիչների ու սովորողների հետ, հետաքրքրվել նրանց առաջադիմությամբ, մասնագիտական հետաքրքրություններով և կողմնորոշմամբ։ Այցի ընթացքում նախարարը ծսնոթացել է նաև դպրոցի ենթակառուցվածքներին և ուսումնական գործընթացի կազմակերպմանը։ Ներկայում դպրոցում սովորում է 307 աշակերտ։

Դպրոցն ապահովված է շուրջօրյա ջրամատակարարմամբ, գործում են ժամանակակից լաբորատորիաներ, համակարգչային կենտրոն, որոնք հնարավորություն են տալիս ուսուցումն իրականացնել առավել գործնական միջավայրում։ Աշակերտների խոսքով՝ նոր դպրոցում իրենց ամենաշատը դուր է գալիս ֆուտբոլի խաղադաշտը, որտեղ նրանք ակտիվորեն մարզվում են նաև դասերից հետո: Նախարարը հետաքրքրվել է նաև դպրոցում գործող արտադասարանական խմբակներով։ Բացի շախմատից, դպրոցում գործում են «Նոր ծիլեր» երգչախումբը, կերպարվեստի և գրականության խմբակները, ինչպես նաև առաջինդասարանցիների համար նախատեսված «Բնության քայլ առ քայլ» կրթական ծրագիրը։

Ժաննա Անդրեասյանն ընդգծել է, որ ժամանակակից համակարգչային և ուսումնագիտական լաբորատորիաները կարևոր դեր ունեն աշակերտների հետաքրքրությունների բացահայտման և մասնագիտական կողմնորոշման ձևավորման գործում:

Գյուլագարակի միջնակարգ դպրոցի վերանորոգման աշխատանքներն իրականացվել են 2025 թվականին։ Ծրագրի ընդհանուր արժեքը կազմել է 293,672.6 հազար դրամ։

Լոռի Բերդ համայնքում նախարարն այցելել է Ագարակի միջնակարգ դպրոց, որտեղ ծանոթացել է իրականացված վերանորոգման աշխատանքներին, ինչպես նաև դպրոցի նոր մարզադահլիճի հնարավորություններին։ Զրուցելով ուսուցիչների հետ՝ Ժաննա Անդրեասյանը հետաքրքրվել է մասսայական սպորտի միջոցառումներին, այդ թվում՝ «ՀՀ վարչապետի գավաթ» սիրողական մրցաշարերին դպրոցականների մասնակցությամբ: Նրանց խոսքով՝ սովորողներն ակտիվորեն մասնակցում են Դպրոցականների բասկետբոլի լիգայի մրցումներին, սեղանի թենիսի մրցաշարին, ինչպես նաև Սպորտլանդիայի մարզական խաղերին: Ժաննա Անդրեասյանը հորդորել է հոգատար վերաբերմունք ցուցաբերել նոր գույքի նկատմամբ՝ այն պահպանելով և խնամքով օգտագործելով։ Նա ընդգծել է, որ անհրաժեշտ է սրտացավ և պատասխանատու վերաբերվել ստեղծված պայմաններին, որպեսզի դրանք երկար ծառայեն իրենց նպատակին և նպաստեն արդյունավետ կրթական միջավայրի ձևավորմանը։

Վերանորոգման աշխատանքներն իրականացվել են 2025 թվականին` Կառավարության ֆինանսավորմամբ։ Ծրագրի ընդհանուր պայմանագրային արժեքը կազմում է 160,854.8 հազար դրամ։ Ագարակի միջնակարգ դպրոցն ունի131 սովորող: