Փաշինյանը ելույթ կունենա Ստրասբուրգի լիագումար նիստերի դահլիճում

Չորեքշաբթի՝ մարտի 11-ին տեղական ժամանակով ժամը 12:00-ին, Նիկոլ Փաշինյանը ելույթ կունենա Ստրասբուրգի լիագումար նիստերի դահլիճում, հայտնում է Եվրոպական խորհրդարանը։

«Փաշինյանի ուղերձը տեղի է ունենում Հայաստանում 2026 թվականի հունիսի 7-ին կայանալիք խորհրդարանական ընտրություններից առաջ, որը, ակնկալվում է, որ կուրվագծի երկրի արագ զարգացող հարաբերությունների հետագա ընթացքը ԵՄ-ի հետ և խաղաղության գործընթացը հարևան Ադրբեջանի հետ։ ՀՀ կառավարությունը հանձնառու է Բաքվի հետ երկարատև խաղաղության հասնելուն և Թուրքիայի հետ հարաբերությունների կարգավորմանը, Արևմուտքի հետ մերձեցմանը և ԵՄ-ին ապագայում հնարավոր անդամակցության հայտ ներկայացնելուն»,- ասված է հաղորդագրության մեջ:

Նշվում է, որ Եվրամիությունն այժմ վիզաների ազատականացման երկխոսություն է վարում Հայաստանի հետ, և մայիսի 5-ին նախատեսված է ԵՄ-ՀՀ գագաթնաժողով։

Հաղորդագրությունում հայտնում են, որ սա  Փաշինյանի երկրորդ ելույթն է Եվրախորհրդարանում՝ 2023 թվականի նախորդ այցից հետո։