Երկու ամսվա ընթացքում միայն դեղորայքի տրամադրման շրջանակներում 2.5 մլրդ դրամ փոխհատուցում ենք իրականացրել. Ավանեսյան

Այս երկու ամիսների ընթացքում միայն դեղորայքի տրամադրման շրջանակներում 2.5 մլրդ դրամ փոխհատուցում ենք իրականացրել: Այդ մասին ասաց առողջապահության նախարար Անահիտ Ավանեսյանը՝ ԱԺ-Կառավարություն հարցուպատասխանի ժամանակ պատասխանելով ՔՊ խմբակցության պատգամավոր Մարիամ Պողոսյանի հարցին:

«Սա ահռելի մեծ թիվ է: Ես մի քանի թվեր էլ հնչեցնեմ. օրինակ՝ 113 հազար 65+ քաղաքացիներ ստացել են մինչև 50 հազար դրամի փոխհատուցում: 15 հազար 65+ քաղաքացիներ ստացել են 50-100 հազար դրամի փոխհատուցում, և այսպես շարունակ: Ես նաև մի բան եմ ուզում ասել, որ մենք իհարկե շատ շեշտադրում ենք 65+ տարիքի անձանց այս կարևորագույն կարիքը բավարարելը, բայց ես ուզում եմ ցույց տալ, որ 200 հազար և ավելի աշխատավարձ ստացողների առումով դիմելիությունը այնպիսին է, ինչպիսին պետք է լինի, և 23675 քաղաքացի ստացել է էլի մինչև 50 հազար դրամի ծառայություններ: Օրինակ` 200 հազարից ավելի աշխատավարձ ստացողներից 162 հոգի ստացել են 1-2 մլն դրամի փոխհատուցում, 36-ը՝ 2-4 մլն դրամի փոխհատուցում, 12-ը` 4 մլն դրամից ավելի փոխհատուցում»,- նշեց նախարարը: