Հայաստանն ու Թուրքիան համաձայնության են եկել ուղիղ ցամաքային առևտրի շուրջ

Ըստ թուրքական T24 հրատարակության՝ Անկարան և Երևանը համաձայնության են եկել Վրաստանի տարածքով  ուղիղ ցամաքային առևտուր սկսելու վերաբերյալ։ 

Նախկինում երկրների միջև բեռնափոխադրումները կատարվում էին Վրաստանում միջնորդների միջոցով և դասակարգվում էին որպես «վերարտահանում»։

Al Monitor-ի լրագրող Էզգի Աքին, հղում անելով երկու առևտրային աղբյուրների, նշում է, որ բեռներն այժմ կպահպանեն իրենց սկզբնական արտահանման կարգավիճակը ողջ ճանապարհորդության ընթացքում։

Կողմերը այս քայլը կատարում են հարաբերությունների կարգավորման գործընթացի շրջանակներում, որը սկսվել է 2022 թվականից՝ ԱՄՆ աջակցությամբ։ Երկրների միջև ուղիղ ավիաբեռնափոխադրումներն արդեն մեկնարկել են։

Ըստ Թուրք-հայկական բիզնեսի զարգացման խորհրդի փոխնախագահ Նոյան Սոյաքի՝ որոշումը որոշ ժամանակ առաջ է կայացվել, և տեխնիկական աշխատանքներն արդեն ընթացքի մեջ են։

Նա նաև նշել է, որ նոր պայմանավորվածությունը 10-15%-ով կնվազեցնի թուրքական ընկերությունների համար լրացուցիչ ծախսերը։