Wizz Air-ի Հայաստան ժամանող ուղևորները մնացել են դրսում՝ խուճապի և անորոշության մեջ

Wizz Air ավիաընկերության հունվարի 9-ին նախատեսված Պրահա–Երևան չվերթի ուղևորներն ահազանգել են, որ մնացել են Պրահայի օդանավակայանում՝ խուճապի և անորոշության մեջ։ Ավիաընկերությունը չեղարկել է չվերթը, առանց պարզաբանելու ինչու և որքան ժամանակով։

«Զրո ինֆորմացիա, զրո կոմունիկացիա հաճախորդի հետ։ Շատ ուղևորներ կային, ովքեր ռեալ իրենց ամբողջ գումարը հանգստի ժամանակ ծախսել էին ու չունեին անգամ ջուր առնելու գումար, ու անգամ ջուր չբաժանեցին։ Մարդիկ այդ պահին պանիկայի մեջ էին, այդ պահին սթրեսված էին, որ իրենց թռիչքը չեղարկվել է, ու մեզ անորոշության մեջ էին պահում, չէին ասում երբ կլինի հաջորդ թռիչքը»,–պատմում է չեղարկված  չվերթի ուղևորներից Էլեն Քանդարյանը։

«Wizz Air–ը ոչ մի տեղեկություն չէր տալիս, App-ը գոյություն չուներ, կախած էր ու ոչ մի ինֆորմացիա չէիր կարողանում նայեիր։ Մոտենում եմ Եվրոպական ավիաուղիների ներկայացուցչին, հարցնում եմ՝ ե՞րբ եք պատրաստվում մեզ ուղարկել Հայաստան, ասում է՝ միգուցե ամսի 14-ին: Տեղում շոկի մեջ ենք ընկնում պանիկայից, որ 5 օր ավել պիտի սպասենք»։

Ուղևորը պատմում է, որ  իրենց իրավունքները պաշտպանելու համար բազմաթիվ հարցումների արդյունքում պարզել են, որ տրամադրվում է ընդամենը 1 օրվա կացություն հյուրանոցում (չտալով  այնտեղ հասնելու տրանսպորտ) այն դեպքում, երբ ուղիղ թռիչքի հաջորդ հնարավորությունն առաջարկում են 5 օրից։

«Չվերթի մեջ կար 100-ից ավել մարդ, ու պատկերացրեք, թե ինչքան տարբեր, ամեն մեկն իր առանձին պատմությունն ուներ․ մի կին, որի շենգեն վիզան էր ավարտվում այդ գիշեր, հղիներ կային, առանձնահատկություն ունեցող երեխա կար, որին դժվար էր հյուրանոց հասնելը և այլն։

Էլի է եղել, որ իմ չվերթը չեղարկվել է այլ ավիաընկերությունով, բայց տրանսպորտով ինձ տեղափոխել են հյուրանոց, վաուչեր են տվել սննդի համար, ջրի համար և այլն։ Ես չեմ համեմատում այլ ավիաընկերության սերվիսները, ինձ նյարդայնացրել է անորոշությունը։

Մենք մեր գլխի ճարը տեսանք Պրահայից Քութայիսի, այնտեղից էլ Երևան տաքսիով՝ մոտ 450 կմ, որը բավականին թանկ արժեր, հավելյալ ծախս ու հավելյալ  տանջանք էր։ Իհարկե մարդիկ կային, որ ընտրեցին Պրահա-Երևան ռեյսին սպասել, գնացին հյուրանոց, ու չգիտեմ քանի օր են այնտեղ սպասելու՝ մինչև հետ գան»։

Սա միակ ահազանգը չէ Wizz Air–ի չեղարկված չվերթների, պատշաճ կերպով չծանուցված և փոխհատուցում չստացած ուղևորների վատ փորձի մասին։ Ավիաընկերությունը պարտավոր է ապահովել ուղևորների տեղեկացված լինելու իրավունքը, սահմանված կարգով ծանուցել չվերթների չեղարկման և հետաձգման մասին, և ապահովել այլընտրանքային չվերթ, ըստ կարգի հոգալ սննդի, կեցության և տեղափոխման հարցերը։ Wizz Air–ի ուղևորները հաճախ են ահազանգում իրենց իրավունքների ոտնահարման և ավիաընկերության ոչ մարդակենտրոն մոտեցման մասին։