Մալթան քաղաքացիություն է շնորհել պատժամիջոցների տակ գտնվող ռուսաստանցիներին, այդ թվում՝ գործարար Ալբերտ Ավդոլյանին

Ըստ լրատվամիջոցի տեղեկության, ռուսաստանցի գործարար Ալբերտ Ավդոլյանը անձնագիրը ստացել է 2015 թվականին: Հոդվածում նշվում է, որ նրա դեմ պատժամիջոցները «սերտորեն կապված են զենքի հսկա «Ростех»-ի հետ»:

Financial Times-ը գրում է նաև, որ Ավդոլյանը այն յոթ մարդկանցից մեկն է, որոնք Մալթայի քաղաքացիություն են ստացել և հետագայում  պատերազմի պատճառով ենթարկվել ԵՄ-ի, ԱՄՆ-ի կամ Ուկրաինայի պատժամիջոցներին։ Financial Times-ը հաղորդում է, որ անձնագրերից առնվազն մեկը հետագայում չեղյալ է հայտարարվել։

Պարբերականը տեղեկացնում է, որ նշված անձինք 16 հոգուց բաղկացած խմբի մաս են կազմում, որոնք վճարել են Մալթայի քաղաքացիություն ստանալու համար՝ չնայած եղել են քաղաքականորեն նշանակալի մարդիկ կամ դատապարտվել են  հանցագործությունների համար կամ հետագայում հայտնվել են պատժամիջոցների ցուցակներում։

Ըստ Malta Independent պարբերականի, ներդրումների միջոցով քաղաքացիություն ստանալու մալթայական սխեման, որն անվանում են «ոսկե անձնագիր», ներդրվել է 2014 թվականին՝ «Անհատական ​​ներդրողի ծրագիր» անվամբ, որը թույլ է տալիս գերհարուստ անհատներին ձեռք բերել Մալթայի քաղաքացիություն մոտ 1 միլիոն եվրոյով՝ անշարժ գույք գնելու պարտավորության հետ մեկտեղ։ Ծրագիրը փոխվել է և այժմ կոչվում է «Մալթայի քաղաքացիություն՝ բնականացման միջոցով՝ բացառիկ արժանիքների և ուղղակի ներդրումների համար»։

Սա հանգեցրեց Եվրոպական հանձնաժողովի կողմից դատական հայցի, որը պնդում էր, որ «ոսկե անձնագրերի» տերերի և Մալթայի միջև «իրական կապ» չկա, և որ, հետևաբար, Մալթան չի կատարում ԵՄ պայմանագրով ստանձնած իր պարտավորությունները, երբ խոսքը վերաբերում է քաղաքացիությանը և անկեղծ համագործակցությանը։

Եվրոպական դատարանը պետք է որոշում կայացնի ներդրումների դիմաց Մալթայի քաղաքացիություն ստանալու սխեմայի դեմ Եվրահանձնաժողովի ներկայացրած հայցի վերաբերյալ։ Մալթայի կառավարությունը մշտապես պնդել է, որ քաղաքացիության հարցերը ազգային կառավարությունների գործն են։