Բայդենը փոխել է երկրի միջուկային ռազմավարությունը

Միացյալ Նահանգների նախագահ Ջո Բայդենը մարտին գաղտնի կերպով հավանություն է տվել երկրի միջուկային ռազմավարության փոփոխություններին: Ըստ այդմ, Վաշինգտոնը պետք է պատրաստ լինի միջուկային զենք ունեցող երեք երկրների. Ռուսաստանի, Չինաստանի և Հյուսիսային Կորեայի, այլ ոչ միայն Մոսկվայի, համակարգված սպառնալիքին, գրում է New York Times-ը։ Պարբերականը (իր համար անսովոր կերպով) տեղեկության աղբյուրը չի նշում։

Պարբերականը պնդում է, որ «Միջուկային զենքի կիրառման հրահանգը» (Nuclear Employment Guidance) այնքան գաղտնի է, որ դրանց էլեկտրոնային պատճենները ստեղծել արգելվում է, դրանք գոյություն ունեն միայն սահմանափակ թվով թղթային օրինակներում, հայտնել է BBC-ն։

Սակայն ռազմավարության փոփոխությունների մասին հպանցիկ կերպով հիշատակվում է վարչակազմի ոչ այնքան բարձրաստիճան պաշտոնյաների վերջին երկու ելույթներում, գրում է New York Times-ը։ Նշվում է, որ նրանց հատուկ լիազորել են բարձրաձայն արտասանել այդ արտահայտությունները։

Այսպես, հունիսին Ազգային անվտանգության խորհրդի տնօրեն Պրանայ Վադդին ասել է, որ նոր ռազմավարությունը «շեշտը դնում է Ռուսաստանի, Չինաստանի և Հյուսիսային Կորեայի համաժամանակյա զսպման անհրաժեշտությունը»։

Ակնկալվում է, որ մինչև իր նախագահության ավարտը (2025 թվականի հունվարի 20-ը) Բայդենը ոչ գաղտնի ծանուցում կուղարկի Կոնգրեսին ռազմավարության փոփոխության մասին, և այն ավելի մանրամասն կլինի, քան այն, ինչ բացահայտել են այս նախկին կամ ներկա պաշտոնյաները, գրում է New York Times-ը։

1940-ականներից ի վեր ամերիկյան միջուկային ռազմավարության հիմնական կիզակենտրոնը Խորհրդային Միության և Ռուսաստանի սպառնալիքներն էին:

Դա միակ երկիրն էր, որն ուներ ԱՄՆ-ի հետ համեմատելի միջուկային զինանոց, և ռիսկը, որ մյուս միջուկային տերությունները կհամակարգեն ԽՍՀՄ-ի հետ Միացյալ Նահանգների առճակատման ժամանակ, գնահատվում էր որպես ցածր։

Սակայն վերջին տարիներին Չինաստանը և Հյուսիսային Կորեան սկսել են սրընթաց կերպով ավելացնել միջուկային զենքի իրենց պաշարները։ Միևնույն ժամանակ, նրանք այդ սպառազինությունը սահմանափակելու շուրջ չեն ցանկանում բանակցությունների մեջ մտնել. միջուկային զենքի վերահսկման միջազգային ռեժիմը վերջին տարիներին արդեն փլուզվում է։

Այս երկրների մարտագլխիկների քանակի մասին հաշվետվության մեխանիզմներ չկան, սակայն Պենտագոնը հաշվարկել է, որ Չինաստանը մինչև 2030 թվականը կունենա 1000 միջուկային մարտագլխիկ, իսկ մինչև 2035 թվականը՝ 1500, ինչը մոտ է թվին, որոնք առկա են Միացյալ Նահանգների և Ռուսաստանի զինանոցում:

Աղբյուրները New York Times-ին պատմել են, որ Չինաստանը, ամենայն հավանականությամբ, նույնիսկ գերազանցում է այդ ժամանակացույցը: Հյուսիսային Կորեան, ըստ ամերիկյան հաշվարկների, ներկա պահին մոտ 60 միջուկային մարտագլխիկ ունի։