Սանիտարահիգիենիկ պահանջների խախտման ամեն դեպքի համար սահմանված է 100.000-300.000 դրամ տուգանք

Այսօրվա դրությամբ մեր սննդի շղթայի օպերատորների բազայում գրանցված՝ հաց տեղափոխող շուրջ 433 տրանսպորտային միջոցի տրամադրել ենք սանիտարական անձնագրեր: Այս մասին «Շանթ» հեռուստաընկերության եթերում ասել է ՍԱՊԾ պետ Իշխան Կարապետյանը:

«Սննդի շղթայի օպերատորների բազայում գրանցվելն օրենքով պարտադիր է: Գրանցված 650 հաց արտադրող կազմակերպությունից ընդամենը 350-ն է իրականացնում հացի տեղափոխում՝ 458 տրանսպորտային միջոցով: Այսօրվա դրությամբ կարող ենք փաստել, որ տրանսպորտային միջոցների շուրջ 70 տոկոսն արդեն իսկ ունի սանիտարական անձնագրեր»,-տեղեկացրել է Իշխան Կարապետյանը:

Նրա խոսքով՝ տրանսպորտային միջոցների սանիտարական անձնագրերի պահանջը օրենսդրորեն ամրագրված է դեռ 2014 թ., օրենքի կիրառման շրջանակում արդեն 2018 թ. փետրվար և մարտ ամիսներից ծառայության կողմից նախաձեռնվեցին բազմաթիվ քննարկումներ այս ոլորտում ներգրավված, այս շղթայի մեջ մասնակցող տարբեր խաղացողների՝ իրացման ցանցերի սեփականատերերի, խանութների սեփականատերերի, հաց արտադրողների, միս-մսամթերք տեղափոխողների հետ: Քննարկումների ընթացքում բոլորին բազմիցս իրազեկվել էր այդ պահանջների մասին, նաև քննարկվել էր, թե արդյոք պատրաստ են իրենք կատարել այդ փոփոխությունը:

«Կատարվել է նաև վերլուծություն, որովհետև խոսքը միայն հաց և միս տեղափոխող տրանսպորտային միջոցների սանիտարական անձնագրեր ստանալու մասին չէ, այլ այն բոլոր տրանսպորտային միջոցների մասին է, որոնք սննդամթերք են տեղափոխում»,-ասել է ՍԱՊԾ պետը:

Ըստ նրա՝ այսօր փուլային հաջորդականությամբ ընտրությունը կանգ է առել առավել ռիսկային և վատ վիճակում գտնվող՝ միս և հաց տեղափոխող տրանսպորտային միջոցների վրա:

Անդրադառնալով այն դեպքերին, երբ հաց կամ միս տեղափոխող տրանսպորտային միջոցներն արդեն ունեն սանիտարական անձնագրեր, բայց չունեն սանիտարահիգիենիկ պատշաճ պայմաններ, հացը տեղափոխում են «բանանի» արկղով և այլն՝ Իշխան Կարապետյանն ասել է. «Այս խնդիրն ավելի խորքային է, որովհետև մենք, լուծելով իրավիճակը, շփվելով մարդկանց հետ և կատարելով որոշակի ուսումնասիրություններ, այս փուլում ընձեռել ենք հնարավորություն տնտեսվարողներին ոչ թե ձեռք բերել նոր տրանսպորտային միջոցներ, այլ բնականաբար վերազինել արդեն եղած հզորությունները, քանի որ հասկանում ենք, որ տևական ժամանակ չհետևելով պահանջներին և պայմաններին, տնտեսվարողին և տեղափոխողին դժվար է համապատասխանեցնել տրանսպորտային միջոցը գործող պայմաններին: Իհարկե, «բանանի» արկղով հաց տեղափոխելն արգելվում է և դրա համար կան օրենսդրությամբ սահմանված հատուկ պայմաններ, որոնց պետք է հետևեն հաց տեղափոխողները»:

ՍԱՊԾ պետի հավաստիացմամբ՝ իրենք փորձում են նախազգուշացնել, այնուհետև կիրառել պատասխանատվության միջոցներ: Պահանջների խախտման յուրաքանչյուր դեպքի համար սահմանված է 100 հազարից 300 հազար դրամ տուգանք:

«Օրենսդրությամբ հացի տեղափոխումը կարող է իրականացվել ինչպես փաթեթավորված, այնպես էլ ոչ փաթեթավորված: Սակայն հացը տեղափոխում են կառավարության որոշմամբ տեխնիկական կանոնակարգերի համաձայն, սննդամթերքի անվտանգության օրենսդրության պահանջներին համապատասխան՝ կամ փայտե արկղերով, կամ պլաստիկե տարաներով, կամ դրա համար համապատասխանեցրած և օրենսդրությամբ չարգելված այլ միջոցներով: Խորհուրդ չի տրվում դնել ստվարաթղթե արկղի մեջ, որովհետև կարող է լինել երկրորդային աղտոտվածություն»,-հստակեցրել է Իշխան Կարապետյանը: