Արայիկ Հարությունյանը հետքայլ է արել իր հռչակած «կարմիր գծերից». Նիկոլ-Ալիեւ ծրագիրն է կյանքի կոչվում. Դավիթ Գալստյան

Արցախի նախագահ Արայիկ Հարությունյանը դեկտեմբերի 14-ին Անվտանգության խորհրդի նիստում նշել էր, որ ադրբեջանական անցակետը իր համար կարմիր գիծ է, եւ մենք որեւէ կերպ չենք ընդունելու այդ անցակետի առկայությունը, սակայն հիմա տեսնում ենք, որ հետքայլ է արվել այդ դիրքորոշումից: Այս մասին  news.am--ի հետ զրույցում նշեց Արցախի ԱԺ «Արդարադություն» խմբակցության ղեկավար Դավիթ Գալստյանը:

Նա հիշեցրեց, որ որոշ ժամանակ առաջ «Ոչ Արցախի էթնիկ զտմանը» շարժման ստորագրահավաքին միացավ Արայիկ Հարությունյանը, որտեղ եւս նշված էր, որ այդ անցակետը կարմիր գիծ է եւ անընդունելի է. «Բայց կարծես այսօր դա այնքան էլ կարմիր գիծ չէ: Արայիկ Հարությունյանը հերթական հետնահանջ քայլն է արել: Մենք Արայիկ Հարությունյանի հետ հանդիպմանը փորձում էինք ճշտել, թե ինչն է պատճառը, որ այդպիսի որոշում են կայացրել, ինչ ձեւաչափով է այդ որոշումը կայացվել: Սակայն ցավոք սրտի, մենք բոլորս մնացինք մեր կարծիքին: Արայիկ Հարությունյանը չկարողացավ հստակ հիմնավորել, թե որն է նման որոշման շարժառիթը, որ այդ անցակետը սկսել է աշխատել: Մենք չենք ուզում ասել, որ մեր այն հայրենակիցները, որոնք ունեն խնդիրներ, ունեն պլանավորած գործեր, չտեղափոխվեն Արցախից Հայաստան եւ Հայաստանից Արցախ: Հարցը դա չէ:

Իշխանությունները ֆեյքային պայքար են սկսել մեր խմբակցության պատգամվոր Մետաքսե Հակոբյանի վրա, փորձում են ներկայացնել, որ մենք պոպուլիզմով ենք զբաղված: Հիշում եք, որ նույնպիսի պայքար էին տանում, երբ մենք դեմ էինք խոսում Բերձորի եւ Աղավնոյի հանձնման դեպքում: Փորձում են ներկայացնել, որ դա մեր հասարակության համար է արվում, բայց տեսնում ենք, որ այդքան էլ այդպես չէ»,-ընդգծեց ընդդիմադիր պատգամավորը:

Նր խոսքով, երբ Ադրբեջանը բնապահպանների անվան տակ Շուշիի ճանապարհը փակել էր, Արայիկ Հարությունյանի առջեւ 5 պայման էին դրել, որոնք պետք է կատարվեին.. «Այսօր այդ բոլոր պայմանները կատարվել են: Այդքանից հետո Արայիկ Հարությունյանն ասում է, որ մենք պայքարելու ենք, բայց այդ պայքարի նշույլները չենք տեսնում: Եթե պայքարը լինելու է Ադրբեջանի բոլոր պահանջները հերթով ընդունելը, մի քիչ զրկանքներով ու պայքարի իմիտացիա ստեղծելով, դա անընդունելի է: Ես համոզված եմ, որ սա դեպի Ադրբեջանի հետ ինտեգրացիա տանող ճանապարհ է: Իշխանությունն այսօր չպետք է թիրախավորեր ընդդիմությանը եւ այն մարդկանց, որոնք իրենց մեղադրում են իրենց հետքայլի համար:

Եթե մենք պետք է ունենայինք այդ անցագրային կետը, եթե պետք է Կաշենի հանքի աշխատանքը կանգներ, եթե պետք է Ռուբեն Վարդանյանին աշխատանքից ազատեին, այդ դեպքում ինչո՞ւ ժողովրդին ստիպեցին անցնել այս զրկանքների միջով եւ այսօր ունենք այն, ինչ ունենք: Ադրբեջանի բոլոր նախապայմանները կատարելով որեւէ հայանպաստ որոշում չեղավ այդ ամենի արդյունքում»,-հայտարարեց Դավիթ Գալստյանը:

Նա համոզմունք հայտնեց, որ ամբողջ ժողովուրդը դեմ էր այս քայլերին, բայց իշխանություններն այսօր դա ձեւակերպում են, որպես հանրային պահանջ, բացում ճանապարհը, այն դեպքում, երբ երաշխավորված չէ մեր ազատամարտիկների, պատերազմի հերոսների՝ այդ ճանապարհով անցնելը:

«Հայկական կողմից որեւէ երաշխիք չի տրվում այդ անձանց, որ նրանք անխափան կարող են անցնել, կամ Ադրբեջանի կողմից հնարավոր քայլրի դեպքում ինչ քայլեր է անելու հայկական կողմը:

Ես այդ հանդիպումից չստացա տպավորություն, որ Արայիկ Հարությունյանի կողմից որեւէ ելք է առաջարկվել: Ընդհակառակը, մեր կողմից մի քանի անգամ առաջարկվել են լուծումներ, որոնց վերաբերյալ այնքան էլ ճիշտ մոտեցում չցուցաբերեց Արայիկ Հարությունյանը: Իհարկե, նա նշում է, որ խորհուրդների կարիք ունի, համախմբում է պահանջում, բայց գործնականում այդ ուղղությամբ քայլեր չենք տեսնում»:

Դավիթ Գայստյանը համոզված է, որ այն, ինչ կատարվում է, Փաշինյան-Ալիեւ պայմանավորվածության արդյունք է. «Ես կրկին ու կրին համոզվում եմ, որ սա մեծ ծրագիր է Արցախին հիասթափեցնելու, ընկճելու, Արցախը հայաթափելու: Նիկոլ-Ալիեւ ծրագիրն է կյանքի կոչվում: Ալիեւը հայտարարում է, որ ճանապարհը բաց է, եւ հաջորդ օրը, չգիտես ինչու, որոշում է կայացվում, որ այդ անցակետը պետք է օգտագործվի»,-ասաց նա:

Հիշեցնենք, որ հունիսի 7-ին «Արցախի անվտանգության և զարգացման ճակատ» հանրային շարժման նորընտիր խորհուրդը հանդիպում է ունեցել Արցախի Հանրապետության նախագահ Արայիկ Հարությունյանի հետ: Հանդիպումը կայացել է Շարժման խորհրդի նախաձեռնությամբ՝ հունիսի 4-ից Բերձորի՝ «Լաչինի միջանցք»-ում տեղակայված ադրբեջանական ապօրինի անցակետով քաղաքացիական անձանց երթևեկի հարցը քննարկելու նպատակով։