Իշխանություններն արցախցուն այն հոգեվիճակին են հասցնում, որ մարդիկ ուղղակի 1 ժամով, 1 օրով ապրեն. Մետաքսե Հակոբյան

Այս իշխանություններն ամեն ինչ անում են, որ բնակչությունն Արցախում անընդհատ ընկճված, հուսահատված վիճակում լինի։ Մամուլի ասուլիսի ժամանակ ասաց ԱՀ ԱԺ պատգամավոր Մետաքսե Հակոբյանը։

«Հասցնում են ան հոգեվիճակին, որ մարդիկ ուղղակի ապրեն 1 օրով, 1 ժամով, չպլանավորեն ոչինչ։ Արցախում երեկ կառավարության նիստ էր, և Արայիկ Հարությունյանը խոսում էր սոցիալական ծրագրերի մասին ու ասում, որ 68 հազար-ից հետո կլինի 25 հազար-ի ծրագիր, և մարդիկ այսուհետ պետք է մտածեն սեփական ուժերով գումար հայթայթելու մասին։ Արցախում այսօր գործազրկություն է, հնարավորություն չկա աշխատելու, եթե վարչապետի ամենամոտ շրջապատից չես և իրեն չես գովերգում»,-նշեց պատգամավորը։

Մետաքսե Հակոբյանի խոսքով արցախցին այսօր ընկճված է։ Պատգամավորը նշում է, որ կառավարությանն է ներկայացրել արցախցիների բազմաթիվ խնդիրներ, սակայն պատերազմից հետո առ այսօր որևէ լուծում չեն ստացել այդ խնդիրները։

«Այնպես է ստացվում, որ եթե ընդդիմությունն է վեր հանում խնդիրը և տալիս իրենց, իրենք ուղղակի դա չեն անում։ Օրերս ինձ մոտ մի մարդ էր եկել, որն ուղղակի փողոցում է հայտնվել, մեկ ուրիշը խանութներին այնքան պարտք է, որ իրեն ուղղակի հաց չեն տալիս»,-ասաց Մետաքսե Հակոբյանը։