Հայաստանի ներկայիս իշխանությունների օգտին քվեարկած մարդիկ իրենց ապագան այլ երկրում են փնտրում. Աշոտ Բարսեղյան

Հայաստանի ներկայիս իշխանությունների օգտին քվեարկած մարդիկ հոգու խորքում իրենց ապագան չեն կապում երկրի հետ եւ ցանկանում են արտագաղթել: Այս մասին NEWS.am-ի թղթակցի հետ զրույցում ասաց հանրային սննդի ոլորտի փորձագետ Աշոտ Բարսեղյանը:

Նա պարզաբանեց, որ արտագաղթել է մարդկանց այն հատվածը, որը մանդատ է տվել ներկայիս իշխանություններին՝ հանուն ապագայի, սակայն այդ ապագան փնտրում է այլ երկրում:

«Շատերն իրենց ապագան չեն կապում երկրի հետ: Մարդիկ հեռանում են կորոնավիրուսի ծանր հետեւանքների, պատերազմի եւ անվտանգության խնդիրների հետեւանքով: Պատճառները կապված են Հայաստանի շուրջ ստեղծված քաղաքական ու աշխարհաքաղաքական իրավիճակի հետ», - հավելեց Բարսեղյանը:

Նա նշեց, որ չնայած տնտեսության դրական միտումների մասին իշխանությունների հայտարարություններին՝ գնաճն առավել քան շոշափելի է:

«Վիճակագրությունը միշտ կարող է ներկայացվել դրական լույսի ներքո, սակայն երբ անմիջականորեն աշխատում ես մատակարարների հետ, այլ պատկեր է ստեղծվում: Էկոնոմիկայի նախարարը զբաղված է պոպուլիզմով, ինչն անընդունելի է ու շատ վտանգավոր: Չի կարելի 2021 թվականի տվյալները համեմատել կորոնավիրուսային տարվա ցուցանիշների հետ եւ ուրախանալ: Բացասական սպասումները ծայրահեղ բացասական ազդեցություն են ունենում տնտեսության վրա, եւ արդեն դժվար է պատկերացնել, թե ինչպես հնարավոր կլինի վերականգնել հանրային սննդի ոլորտի՝ 2017-2018 թվականների ցուցանիշները», - ընդգծեց Աշոտ Բարսեղյանը: