General Motors-ն ավելի քան 73 հազար էլեկտրամոբիլ է հետ կանչել անսարքության պատճառով

Ամերիկյան General Motors ավտոմոբիլային ընկերությունը հետ է կանչում ավելի քան 73 հազար Chevrolet Bolt էլեկտրամոբիլ Կանադայից եւ ԱՄՆ-ից՝ մարտկոցների այրման սպառնալիքի պատճառով, ասվում է ընկերության կայքում հրապարակված հայտարարության մեջ:

«General Motors-ը կամավոր կերպով ընդլայնում է Chevrolet Bolt մակնիշի ավտոմեքենաների հետկանչը ՝ ընդգրկելով 2019 թվականի մնացած մասը եւ 2020-2022 թվականների բոլոր ավտոմեքենաները, այդ թվում Bolt EUV (Electric SUV) մոդելը: Հազվագյուտ դեպքերում այդ տրանսպորտային միջոցների համար ընկերությանը մատակարարվող մարտկոցները կարող են արտադրական երկու թերություն ունենալ, ինչը մեծացնում է այրման վտանգը»,- նշվում է կայքում:

Թերի մարտկոցների փոխարինման համար անհրաժեշտ լրացուցիչ ծախսերը 1 միլիարդ դոլար կկազմեն, հայտնել են ընկերությունում: